વડોદરાઃ શહેરના કારેલીબાગ વિસ્તારમાં વહેલી સવારે એક સિનિયર સિટિઝનને ચપ્પુ બતાવી દોઢ તોલાની બે વીંટી લૂંટી લેનાર બે લૂંટારાને ક્રાઇમ બ્રાન્ચે ઝડપી પાડયા છે.
કારેલીબાગના મુક્તાનંદ નજીક સિધ્ધાર્થ નગરમાં રહેતા અને નિવૃત્ત જીવન ગાળતા મહેશભાઇ રામીએ પોલીસને કહ્યું છે કે,ગઇ તા.૧૮મીએ સવારે પાંચેક વાગે હું વોક માટે નીકળ્યો ત્યારે આનંદનગર રોડ પર હનુમાનજીના મંદિરથી અમિતનગર સર્કલ જવાના રસ્તે સ્કૂટર પર બે શખ્સે મને માંડવી જવાનો રસ્તો પૂછ્યો હતો.
મેં તેમને કહ્યું હતું કે,તમે અવળે રસ્તે આવી ગયા છો.બીજા રસ્તે જવું પડશે.જે દરમિયાન એક જણાએ મને ચપ્પુ બતાવી રૃપિયા માગ્યા હતા.મેં તેમને રૃપિયા નહિ હોવાનું કહેતાં હાથમાં પહેરેલી સોનાની દોઢ તોલાની બે વીંટી લૂંટી બંને ફરાર થઇ ગયા હતા.
ઉપરોક્ત બનાવ અંગે કારેલીબાગ પોલીસે લૂંટનો ગુનો નોંધી ટીમો બનાવી હતી.જે દરમિયાન ક્રાઇમ બ્રાન્ચના પીઆઇ ડીજે ચૂડાસમાની ટીમે નંબર પ્લેટ વગરના સ્કૂટર સાથે વિશાલ ગોપાલનાથ ભાટી અને કરણનાથ રાજુનાથ ભાટી(બંને રહે.મદારી મહોલ્લો,દરજીપુરા)ને ઝડપી પાડયા હતા.તપાસ દરમિયાન તેમની પાસે રોકડા રૃ.૬૪ હજાર મળતાં પૂછપરછ કરી હતી.જે રકમ તેમણે બે દિવસ પહેલાં લૂંટેલી બે વીંટી ઓળખીતા રાહુલને રૃ.૧.૬૦ લાખમાં વેચી તેમાંથી બચેલી હોવાની વિગતો ખૂલી હતી.
