શિતલ પાર્ક પાસે શહીદ સુખદેવસિંહ ટાઉનશીપનો બનાવ
પુત્રીના ઘરે રોકાવા ગયેલા વૃધ્ધ એપાર્ટમેન્ટ પાસે બેઠા હતા ત્યારે ઘટનાઃ કાર ચાલક સામે ગુનો
રાજકોટ: જીવરાજ પાર્કમાં રહેતાં દેવજીભાઈ ગોરધનભાઈ ધામી (ઉ.વ.૭૦) ૧૫૦ ફૂટ રિંગ રોડ પર શિતલ પાર્ક નજીક શહિદ સુખદેવસિંહ ટાઉનશિપમાં હતા ત્યારે તેજ સ્થળે રહેતા પુલીન ગણાત્રા નામના શખ્સે કાર રીવર્સમાં ચલાવી તેને હડફેટે લીધા હતા. આ મામલે ઠપકો આપતા પુલીને દેવજીભાઈ અને પુત્રી સોનલબેનને ગાળો દઈ ખુનની ધમકી આપતા ગાંધીગ્રામ-ર પોલીસ મથકમાં ફરિયાદ નોંધાઈ છે.
દેવજીભાઈ ગઈ તા.રનાં પુત્રી સોનલબેન (રહે. શહીદ સુખદેવસિંહ ટાઉનશિપ)ના ઘરે રોકાવા ગયા હતા. તે એપાર્ટમેન્ટ નીચે બહાર બેઠા હતા ત્યારે એપાર્ટમેન્ટના પાર્કિંગમાંથી આરોપી પુલીને કાર પુરપાટ વેગે રીવર્સમાં લઈ તેને હડફેટે લેતાં ઈજા પહોંચી હતી. બુમાબુમ થતા તેની પુત્રી સોનલબેન ઉપરાંત અન્ય રહેવાસીઓ એકઠા થઈ ગયા હતા. આ સમયે દેવજીભાઈએ ‘આવી રીતે કાર ન ચલાવાય’ કહેતા આરોપીએ તેને અને તેની પુત્રી સોનલબેનને ગાળો દઈ ‘અહીં ગાડી ચલાવતા હોય ત્યારે રસ્તામાં બેસાય નહી, આતો કાર છે, મારી ટ્રક હોય તે પણ ચડાવી દઉ’ કહી ધમકી આપી હતી. બીજી તરફ ઈજા થતા દેવજીભાઈને ખાનગી હોસ્પિટલે ખસેડાયા હતા.
