અમદાવાદ, શુક્રવાર
પૂર્વ વિસ્તારમાં હિટ એન્ડ રન તથા અકસ્માતમાં મોતના બનાવોમાં ચિંતાજનક વધારો થઇ રહ્યો છે. કાલુપુર ચોખા બજાર પાસે ફૂટપાથ ઉપર સૂઇ રહેલ યુવકનું અમદાવાદ મ્યુનિસિપલ કોર્પોરેશનના ડમ્પરના ટાયર નીચે કચડાતાં મોત થયું હતું. અકસ્માત કરીને ડમ્પર મૂકીને ડ્રાઇવર ભાગી ગયો હતો. સિવિલમાં સારવાર દરમિયાન યુવકનું મોત થયું હતું. ટ્રાફિક પોલીસે ગુનો નોંધીને ડમ્પર ચાલક અને મૃતકના વાલી વારસોની શોધખોળ કરવાની કાર્યવાહી હાથ ધરી છે.
સવારે અક્સમાત થયો સારવાર દરમિયાન સાંજે યુવકનું મોત ઃ ટ્રાફિક પોલીસે ગુનો નોંધી વાહન ચાલક અને મૃતક યુવકના વાલી વારસોની શોધખોળ હાથ ધરી
ટ્રાફિક એફ ડિવિઝન પોલીસ સ્ટેશનમાં ફરજ બજાવતા હે. કો. પ્રતિક કુમારે એફ ડિવિઝન પોલીસ સ્ટેશનમાં અજાણ્યા ડમ્પર ચાલક સામે ગુનો નોંધાવ્યો છે કે ૩૭ વર્ષના યુવક બેકાર હોવાથી કાલુપુર ચોખાબજાર પાસે ફૂટપાથ ઉપર રહેતો હતો તા. ૨૫ના રોજ રાતે તે ફૂટપાથ ઉપર સૂઇ રહ્યો હતો .
બીજા દિવસે સવારે પૂરઝડપે આવી રહેલા અમદાવાદ મ્યુનિસિપલ કોર્પોરેશનના ડમ્પર ચાલકે યુવકના પગ ઉપર ડમ્પર ચઢાવી દેતા ગંભીર ઇજાઓ પહોંચી હતી. અકસ્માત બાદ આસપાસના લોકો ભેગા થતા ડમ્પર મૂકીને ડ્રાઇવ ભાગી ગયો હતો. ઇજાગ્રસ્ત યુવકને સારવાર માટે સિવિલ હોસ્પિટલમાં દાખલ કરવામાં આવ્યો હતો. જ્યાં સારવાર દરમ્યાન મોત થયું હતું. ટ્રાફિક પોલીસે ગુનો નોંધીને ડમ્પર ચાલક અને મૃતકના વાલી વારસોની શોધખોળ કરવાની કાર્યવાહી હાથ ધરી છે.
