વડોદરા, તા.2 વડોદરા મહાનગરપાલિકા વિસ્તારમાં આવેલા અનેક વિસ્તારોની મિલકતોના પ્રોપર્ટીકાર્ડ છેલ્લા ત્રણ મહિના ઉપરાંતથી બનવાની પ્રક્રિયા ઠપ થઇ જતા મિલકતધારકો હેરાન પરેશાન થઇ રહ્યા છે અને હજી પણ ક્યારે પ્રોપર્ટીકાર્ડ તૈયાર થશે તે અંગે કોઇ સમય નક્કી નથી.
ઉલ્લેખનીય છે કે વડોદરા મહાનગરપાલિકાના નવા વધારાના વિસ્તારમાં નવા સર્વે નંબરોની પ્રોપર્ટી પરની મિલકતોના પ્રોપર્ટીકાર્ડ તૈયાર કરવાની કામગીરી રાજ્ય સરકાર દ્વારા સીકોન પ્રા.લી. નામની એજન્સીને સોંપવામાં આવી હતી. વર્ષ-૨૦૧૫થી શરૃ થયેલી આ કામગીરી શરૃઆતના તબક્કામાં યોગ્ય રીતે ચાલી હતી પરંતુ છેલ્લા ઘણા વર્ષોથી ધીમી ગતિ બાદ અને હવે ત્રણ માસથી પ્રોપર્ટીકાર્ડ તૈયાર કરવાનું કામ અટકી ગયું છે.
સૂત્રોએ જણાવ્યું હતું કે ખાનગી એજન્સીએ સમયસર કામગીરી કરી નહી હોવાથી વારંવાર નોટિસો આપવામાં આવી હતી અને ચાર મહિના પહેલા રૃા.૮ લાખનો દંડ પણ કરવામાં આવ્યો છે. જો કે બાદમાં એજન્સી દ્વારા મિલકતોના દસ્તાવેજ સ્વીકારવાના, લે આઉટ તૈયાર કરવા ઉપરાંત ડ્રોઇંગ બનાવી સિટિ સર્વે કચેરીમાં સબમિટ કરવાનું કામ છેલ્લા ત્રણ માસથી બંધ કરી દેવામાં આવ્યું છે જેના પગલે મિલકતના માલિકો પ્રોપર્ટીકાર્ડ મેળવવામાં વંચિત થઇ રહ્યા છે.
ગાંધીનગર ખાતેની કચેરી તેમજ ખાનગી એજન્સી વચ્ચેના ગજગ્રાહના કારણે સામાન્ય માણસો હેરાન પરેશાન થઇ રહ્યા છે. પ્રોપર્ટીકાર્ડ નહી મળવાના કારણે મિલકતના માલિકોને બેંક લોન મેળવવા ઉપરાંત વિવિધ સરકારી કચેરીઓમાં અન્ય સવલતો માટે અરજીઓ કરવામાં મુશ્કેલીનો સામનો કરવો પડી રહ્યો છે. માત્ર વડોદરામાં જ નહી પરંતુ અન્ય મહાનગરોમાં પણ આ એજન્સીએ કામ બંધ કરી દીધું હોવાનું જાણવા મળ્યું છે.
તત (બોક્સ)
કલેક્ટર જમીન બિનખેતી કરે તેના પ્રોપર્ટીકાર્ડ તૈયાર થઇ જાય છે
(પ્રતિનિધિદ્વારા) વડોદરા,સોમવાર
વર્ષ-૨૦૧૫માં રાજ્ય સરકાર દ્વારા એક જાહેરનામું પ્રસિધ્ધ કરીને મહાનગરપાલિકાના વધારાના વિસ્તારોના સર્વે નંબરો સાથેની યાદીના પ્રોપર્ટીકાર્ડ તૈયાર કરવાની કામગીરી સીકોન કંપનીને સોંપી હતી. આ સર્વે નંબરો પર બનેલી મિલકતોના પ્રોપર્ટીકાર્ડ તૈયાર થતા નથી પરંતુ કલેકટર કચેરી દ્વારા જમીન બિનખેતી થયા બાદ તેના પ્રોપર્ટીકાર્ડ તૈયાર થાય તેવા કિસ્સામાં જે તે મિલકતોના પ્રોપર્ટીકાર્ડ તૈયાર થઇ જાય છે.
તત (બોક્સ)
પ્રોપર્ટીકાર્ડને લગતું કામ નવેમ્બર માસથી બંધ કરી દીધું છે
(પ્રતિનિધિદ્વારા) વડોદરા,સોમવાર
વડોદરા મહાનગરપાલિકાના નવા વિસ્તારો માટે વર્ષ-૨૦૧૫થી પ્રોપર્ટીકાર્ડની કામગીરી કરતી ખાનગી એજન્સી સીકોનના સૂત્રોએ જણાવ્યું હતું કે અમે બીજા વર્ષે જ કામ પૂર્ણ કરી દીધું હતું અને બાદમાં વારંવાર એક્ષ્ટેન્શન મળતું હતું. હવે વધારાનું એક્ષ્ટેન્શન માર્ચ-૨૦૨૫થી સરકારે આપ્યું નથી તેમ છતાં અમે નવેમ્બર માસ સુધી કામ કર્યુ હતું અને બાદમાં કામગીરી બંધ કરી દીધી છે.
