Gujarat Heatwave Action Plan 2025: ગુજરાતમાં ગરમીનું પ્રમાણ વધી રહ્યું છે અને કેટલાંક જિલ્લામાં હિટવેવ પણ શરુ થઈ છે. ત્યારે પ્રાથમિક શિક્ષણ વિભાગ દ્વારા તમામ જિલ્લા શિક્ષણ અધિકારી (DEO) અને જિલ્લા પ્રાથમિક શિક્ષણાધિકારી(DPEO)ને પરિપત્ર કરીને હિટવેવ ઍક્શન પ્લાન-2025નો સ્કૂલોમાં અમલ કરાવવા માટે આદેશ કરાયો છે. જેમાં શાળાઓને ખુલ્લામાં વર્ગો ન યોજવા તથા કાર્યક્રમ ન કરવા તેમજ જરૂરિયાત મુજબ શાળાનો સમય બદલવા માટે આદેશ આપ્યો છે.
ગુજરાત હિટવેવ ઍક્શન પ્લાન 2025
ગુજરાત સરકારના મહેસૂલ વિભાગ હેઠળના રાહત કમિશ્નર અને સચિવ કચેરી દ્વારા રાજ્યમાં વધતી ગરમીને લઈને પૂર્વ તૈયારી કરવા જણાવવામાં આવ્યું છે. ગુજરાત હિટવેવ ઍક્શન પ્લાન 2025 અનુસાર, કાર્યવાહી હાથ ધરવા તથા ખાસ હિટવેવને સાયલન્ટ ડિઝાસ્ટર તરીકે ગણવામાં આવતું હોઈ તકેદારીના ખાસ પગલાં લેવા સરકાર દ્વારા સૂચનાઓ અપાઈ છે. જેને પગલે પ્રાથમિક શિક્ષણ નિયામકની કચેરી દ્વારા તમામ ડીઈઓ અને ડીપીઈઓને પરિપત્ર કરીને હિટવેવ ઍક્શન પ્લાનનો અમલ કરાવવા અને રાજ્યની પ્રાથમિક શાળામાં ખાસ તકેદારીના પગલા લેવામાં આવે તે રીતનું આયોજન કરવા આદેશ કરવામાં આવ્યો છે.
સરકારની સૂચના મુજબ તમામ સ્કૂલોમાં શિક્ષકોની મદદથી બાળકોને હિટવેવ અને તેની અસરો તથા બચવાના ઉપયાગો વિશે સમજણ આપવાની રહેશે. આ ઉપરાંત ઉનાળા દરમિયાન કોઈ પણ પ્રકારના ઓપન-એર વર્ગો તથા કાર્યક્રમો હાથ ધરવાના રહેશે નહીં. ઉનાળાની ઋતુમાં શાળાના સમયમાં જરૂરીયાત મુજબ ફેરફાર કરવાનો રહેશે. આ બાબતે તમામ સ્કૂલોને સૂચનાઓ આપવા સરકારે ડીઈઓ-ડીપીઓને પરિપત્ર કરીને આદેશ કર્યો છે.
જિલ્લા શિક્ષણાધિકારી શાળાના સમયમાં ફેરફાર કરી શકશે
હિટવેવને લઈને શિક્ષણ રાજ્યમંત્રી પ્રફુલ પાનસેરિયાએ જણાવ્યું કે, ‘રાજ્યના તમામ જિલ્લાઓમાં જિલ્લા શિક્ષણાધિકારી ગરમીનું પ્રમાણ જોઈને શાળાના સમયમાં ફેરફાર કરી શકશે, તેમને રાજ્ય સરકાર પાસે કોઈ પણ પ્રકારની મંજૂરી મેળવવાની રહેશે નહીં. શાળામાં વિધાર્થીઓ પ્રાર્થના બાદ ઉનાળાના સમયગાળા દરમિયાન મેદાનમાં ખેલકૂદની પ્રવૃત્તિઓ કરી શકશે નહીં. ગરમીમાં શિક્ષકોએ વિધાર્થીઓ સમયસર પાણી પીવે તે તેમને યાદ કરાવવાનું રહેશે. રાજ્યના નાગરીકોએ હિટવેવથી ડરવાની નહીં, પરંતુ જાગૃતિ સાથે પોતાના બાળકની કાળજી રાખવાની જરૂર છે.’
આ પણ વાંચો: હવામાન વિભાગની આગાહી: 4 દિવસ રાજ્યના 9 જિલ્લામાં હિટવેવનું યલો-ઑરેન્જ ઍલર્ટ, કચ્છમાં રેડ ઍલર્ટ
ઉલ્લેખનીય છે કે, ગરમીને લઈને થોડા સમય અગાઉ બપોરની સ્કૂલના સમયને સવારની પાળી સાથે ચલાવવા માટે માંગ કરવામાં આવી હતી. બપોરે 12 વાગ્યાથી સાંજે 5 વાગ્યા સુધી ચાલતી સ્કૂલો સવારે 7:30થી બપોરે 12:00 વાગ્યા સુધી કરવામાં આવે તેવી માંગ પણ કરવામાં આવી હતી.
આગામી બે દિવસ કચ્છમાં રેડ ઍલર્ટ
હવામાન વિભાગ દ્વારા આગામી ચાર દિવસ સૌરાષ્ટ્ર-કચ્છ અને ઉત્તર ગુજરાતના 9 જિલ્લામાં રેડ, યલો અને ઑરેન્જ ઍલર્ટ જાહેર કરવામાં આવ્યું છે. જેમાં હવામાન વિભાગે આવતીકાલે રવિવારે (6 એપ્રિલ, 2025) અને 7 એપ્રિલના રોજ કચ્છ જિલ્લામાં હિટવેવનું રેડ ઍલર્ટ જાહેર કર્યું છે. આ સાથે બનાસકાંઠા, સાબરકાંઠા, પાટણ, મહેસાણા, જૂનાગઢ અને પોરબંદર જિલ્લામાં યલો ઍલર્ટ અને મોરબી અને રાજકોટ જિલ્લામાં ઑરેન્જ ઍલર્ટ જાહેર કર્યું છે.
