વડોદરાઃ અમદાવાદની સેવન્થ ડે સ્કૂલમાં વિદ્યાર્થીની અન્ય વિદ્યાર્થી દ્વારા કરવામાં આવેલી હત્યા બાદ શાળાઓમાં વિદ્યાર્થીઓની સુરક્ષા અંગે વાલીઓ ચિંતિત છે.જેની વચ્ચે વડોદરા પોલીસ દ્વારા આજે સ્કૂલોમાં સુરક્ષા માટે સેમિનારનું આયોજન કરવામાં આવ્યું હતું.જેમાં સ્કૂલોના ૬૦૦ કરતા વધારે પ્રતિનિધિઓ હાજર રહ્યા હતા.
વડોદરા પોલીસે સ્કૂલો, વાલી મંડળ, સિક્યુરિટી એજન્સીઓના પ્રતિનિધિઓને સુરક્ષા માટેની જરુરી ગાઈડ લાઈન પૂરી પાડી હતી.વડોદરા પોલીસ કમિશનરના અધ્યક્ષ સ્થાને યોજાયેલા કાર્યક્રમમાં અપાયેલા સૂચનો પ્રમાણે સ્કૂલોએ શાળા સંકુલમાં અવર જવર કરતા દરેક વ્યક્તિ પર નજર રાખવી, સાથે સાથે ં શૈક્ષણિક અને બિન શૈક્ષણિક સ્ટાફની સાથે સુરક્ષા ગાર્ડ અને સફાઈ કામદારોનું પોલીસ વેરિફિકેશન કરાવવું જરુરી છે.સેમિનારમાં સ્કૂલોને શાળાના મેદાન, વર્ગખંડો, અન્ય વિસ્તારોમાં લાગેલા સીસીટીવી કેમેરાની નિયમિત રીતે ચકાસણી કરવાની તેમજ શાળાના કમ્પાઉન્ડની દીવાલોની ઉંચાઈ પણ યોગ્ય હોય હોય તેનું ધ્યાન રાખવાનું સૂચન કરવામાં આવ્યું હતું.
સ્કૂલોમાં બાળકોને ઘરેથી લાવતા અને મૂકી જતા રીક્ષા તથા વાનના વાહન ચાલકો, શાળાના વાહનોના ચાલકોનું પણ પોલીસ વેરિફિકેશન કરાવવા પર, વાહનોમાં સીસીટીવી કેમેરા અને જીપીએસ સિસ્ટમ લગાવવા પર પણ ભાર મૂકવામાં આવ્યો હતો.રીક્ષામાં નિયમ કરતા વધારે બાળકોને નહીં બેસાડવા માટે અને બસમાં બારીઓને જાળી હોય તે સુનિશ્ચિત કરવા માટે જણાવવામાં આવ્યું હતું.
સેમિનારમાં કરાયેલા અન્ય સૂચનો
સાયબર ક્રાઈમ, ઓનલાઈન ગેમિંગની લત અંગે બાળકોને જાણકારી આપવામાં આવે
બાળકો સાથે મૈત્રિપૂર્ણ વાતાવરણ કેળવીને તેમની સમસ્યાઓ અને ફરિયાદોને સાંભળવી. તેમને ગૂડ ટચ અને બેડ ટચ અંગે સમજ આપવી
સ્કૂલોએ કોઈ પણ પ્રકારની શંકાસ્પદ પ્રવૃત્તિ દેખાય તો પોલીસને જાણ કરવી.શહેર પોલીસની શી ટીમ શાળાની બહાર પણ પેટ્રોલિંગ કરે છે.જરુર પડે તો સ્કૂલો તેમનો સંપર્ક કરી શકે છે.
બાળકોને સાયબર બુલિંગ, ઓનલાઈન ગેમિંગની લતના કારણે તથા અજાણ્યા લોકો સાથે સંપર્કના કારણે થતા નુકસાન અંગે સમજાવવા વિશેષ લેકચરનું આયોજન કરવું.
સાયબર ક્રાઈમની ઘટના બને તો નજીકના પોલીસ મથકનો કે સાયબર ક્રાઈમ વિભાગનો સંપર્ક કરવો.
આગ, ભૂકંપ જેવી કુદરતી આપત્તિઓને ધ્યાનમાં રાખીને નિયમિત રીતે સ્કૂલોમાં મોકડ્રિલનું આયોજન કરવામાં આવે.
