Rain in Gujarat: ગુજરાતમાં મેઘમહેર યથાવત્ રહેતાં સરેરાશ 31.50 ઈંચ સાથે સિઝનનો 90 ટકા વરસાદ વરસી ચૂક્યો છે. ચોમાસાની વર્તમાન સિઝનમાં જૂનમાં સરેરાશ સૌથી વધુ 12 ઈંચ, જુલાઇમાં 10 ઈંચ જ્યારે ઓગસ્ટમાં 9.50 ઈંચ જેટલો વરસાદ નોંધાયો છે. હાલ રાજ્યના 48 તાલુકા એવા છે, જ્યાં 40 ઈંચથી વધુ વરસાદ નોંધાયો છે, જ્યારે 100 ટકા વરસાદ વરસ્યો હોય તેવા 10 જિલ્લા છે.
દક્ષિણ ગુજરાતમાં સૌથી વધુ 55 ઈંચ વરસાદ
રીજિયન પ્રમાણે જોવામાં આવે તો દક્ષિણ ગુજરાતમાં 55 ઈંચ સાથે સિઝનનો સૌથી વધુ સરેરાશ 94 ટકા વરસાદ નોંધાયો છે. બીજી તરફ પૂર્વ મધ્ય ગુજરાતમાં 28 ઈંચ, ઉત્તર ગુજરાતમાં 27 ઈંચ, સૌરાષ્ટ્રમાં 25 ઈંચ અને કચ્છમાં 16 ઈંચ વરસાદ વરસ્યો છે. મોટાભાગના રીજિયનમાં સરેરાશ કરતાં 85 ટકાથી વધુ વરસાદ નોંધાયો છે.
જિલ્લા પ્રમાણે વલસાડમાં સૌથી વધુ 84 ઈંચ, ડાંગમાં 72 ઈંચ અને નવસારીમાં 66 ઈંચ વરસાદનો સમાવેશ થાય છે. પાટણ જિલ્લામાં સૌથી ઓછો સરેરાશ 16 ઈંચ વરસાદ નોંધાયો છે. વલસાડ જિલ્લાના કપરાડા તાલુકામાં સૌથી વધુ 110 ઈંચ, સુરતના ઉમરગામમાં 96.25 અને નવસારીના ખેરગામમાં 90 ઈંચ મેઘમહેર થઈ છે.
ગુજરાતના 48 તાલુકામાં 40 ઈંચથી વધુ 140 તાલુકામાં 20થી 40 ઈંચ, 61 તાલુકામાં 10થી 20 ઈંચ વરસાદ નોંધાયો છે અને બે તાલુકા એવા છે જ્યાં વરસાદ હજુ 5 થી 10 ઈંચ વચ્ચે વરસ્યો છે.
આ પણ વાંચો: પંજાબમાં સામાન્ય કરતાં 74% વધુ વરસાદ ખાબકતાં 25 વર્ષનો રેકોર્ડ તૂટ્યો, 1300થી વધુ ગામમાં પૂર
ગયા વર્ષે ઓગસ્ટ સુધીમાં 111 ટકા વરસાદ વરસ્યો હતો
ગુજરાતમાં ગયા વર્ષે 38.65 ઈંચ સાથે સિઝનનો 111 ટકા વરસાદ વરસી ચૂક્યો હતો. જેની સરણામણીએ આ વખતે ઓગસ્ટમાં વરસાદની ગતિ ધીમી પડી છે. ગયા વર્ષે ઓગસ્ટમાં 17.40 ઈંચની સામે આ વખતે 9.50 ઈંચ વરસાદ નોંધાયો છે.
કયા જિલ્લામાં સિઝનનો 100 ટકાથી વધુ વરસાદ નોંધાયો
ઉત્તર ગુજરાત : સાબરકાંઠા, બનાસકાંઠા. પૂર્વ મઘ્ય : મહીસાગર, ખેડા, આણંદ. સૌરાષ્ટ્ર : પોરબંદર, બોટાદ, ભાવનગર. દક્ષિણ : તાપી, સુરત.
