મોસમ વિભાગનું દોઢ માસ બાદ સુધારેલું પૂર્વાનુમાન, હવે 90 ટકા વરસાદ : જૂન માસમાં ગુજરાત સહિત અનેક રાજ્યોમાં વરસાદને બદલે હીટવેવની શક્યતા વધુ : કેરળમાં ચોમાસાનો પ્રવેશ પણ ઢીલમાં
રાજકોટ, : નૈઋત્યનું ચોમાસુ ભારતની દક્ષિણે આંદામાન,બંગાળની ખાડીમાં પ્રવેશી ચૂક્યું છે ત્યારે આજે ભારતના મૌસમ વિજ્ઞાાન વિભાગ દ્વારા દેશમાં આ વખતે જૂનથી સપ્ટેમ્બર એ ચાર માસ દરમિયાન વરસાદનું પ્રમાણ માત્ર 90 ટકા રહેવાની પ્રબળ સંભાવના વ્યક્ત કરી છે. ચિંતાજનક બાબત એ છે કે દોઢ માસ પૂર્વે તા. 13-4-2026ના મોસમ વિભાગે વરસાદ સામાન્યથી ઓછો પડવાની વૈજ્ઞાાનિક મોડેલોના આધારે જે સંભાવના હતી તે હવે નોંધપાત્ર વધીને આશરે બમણી થઈ ગઈ છે.
ભારતના આ ચોમાસાને નબળુ કરતો પ્રશાંત મહાસાગરનો ગરમ પ્રવાહ ‘અલ નીનો’સર્જાવાની પ્રબળ શક્યતા, હિન્દ મહાસાગરમાં દ્વિધુ્રવની હાલ તટસ્થ સ્થિતિ સહિત અનેકવિધ પરિબળાના અભ્યાસના આધારે આજે મોસમ વિભાગે અપડેટેડ લોન્ગ રેન્જ ફોરકાસ્ટ અર્થાત્ ચોમાસુ કેવું રહેશે તેનું સુધારેલું લાંબા ગાળાનું પૂર્વાનુમાન જારી કર્યું છે. આ પૂર્વાનુમાન કેવુ ચોમાસુ રહેવાની શક્યતા કેટલા ટકા તેની વૈજ્ઞાાનિક ઢબે ગણતરીથી અપાતું હોય છે. જે અનુસાર જૂન માસમાં દેશમાં 92 ટકાથી ઓછો વરસાદ થવાની શક્યતા સર્વાધિક છે.
જૂન માસ કૃષિપ્રધાન ગુજરાતમાં ચોમાસાના આગમન માટે સૌથી મહત્વનો માસ રહ્યો છે જે સમયે આશરે 86 લાખ હેક્ટરથી વધુ જમીનમાં વાવણી શરૂ થતી હોય છે. મોસમ વિભાગ અનુસાર આ જૂન માસમાં ગુજરાત ઉપરાંત ઉત્તરપ્રદેશ, પંજાબ, બિહાર, હરિયાણા, છત્તીસગઢ, આંધ્રપ્રદેશના ‘અનેક ‘વિસ્તારોમાં ઉષ્ણ લહર (હીટવેવ અર્થાત્ લૂ વર્ષા)નું પ્રમાણ સામાન્યથી વધારે રહેેશે. આ હીટવેવથી જનસ્વાસ્થ્ય, પાણીની ઉપલબ્ધિ, વિજળી વપરાશ ઉપર પણ અસર પડી શકે છે અને તે અન્વયે ગુજરાત સહિત રાજ્યોને પૂર્વ તૈયારી કરવા પણ સૂચવાયું છે. આ વખતે બંગાળની ખાડીમાં ચોમાસુ વહેલું બેઠું પરંતુ ગત વર્ષે તા. 24 મેના કેરળમાં પ્રવેશી ગયું હતું. તે સામે આજે તા. 29મીના હજુ પ્રવેશ્યુ નથી, મંદ પડયું છે. જેની અસરરૂપે ગુજરાતમાં ચોમાસુ ‘મોડુ અને મોળુ’ રહેવા શક્યતા છે.
