રિમાન્ડ પૂરા થયા બાદ અદાલતના આદેશના પગલે
ગુજસીટોક હેઠળ આજીવન કેદની સજાની જોગવાઈ, હવે મુરગા ગેંગ સામે પણ તોળાતી કડક કાર્યવાહી
રાજકોટ: રાજકોટ અને તેની આસપાસના જિલ્લાઓમાં છેલ્લા દસ વર્ષ દરમિયાન ખૂન, ખૂનની કોશિષ, હુમલા, ડ્રગ્સ-દારૂ સહિતના ૭૧ ગુના આચરી ત્રાસ મચાવનાર પેંડા ગેંગના ગુજસીટોક હેઠળ પકડાયેલા ૧૭ સભ્યોને આજે રિમાન્ડ પૂરા થતાં રાજયની જુદી-જુદી જેલમાં ધકેલી દેવાયા હતા.
શહેરની શાંતિનો ભંગ કરનાર પેંડા ગેંગ સામે અત્યાર સુધી પોલીસે ઢીલી નીતિ અપનાવી હતી. આ ગેંગના સભ્યોએ મંગળા મેઈન રોડ પર ગેંગવોરને કારણે અંધાધૂંધ ફાયરિંગ કરી કાયદો-વ્યવસ્થાની પરિસ્થિતિના લીરા ઉડાડયા બાદ જ પોલીસની ઊંઘ ઉડી હતી. જેને પરિણામે ઉચ્ચ અધિકારીઓએ આ ગેંગ સામે ગુજસીટોકની કાર્યવાહીને લીલી ઝંડી આપી હતી.
જેના પગલે ક્રાઈમ બ્રાંચે પેંડા ગેંગના ૧૭ સભ્યો વિરૂધ્ધ ગુજસીટોક હેઠળ ગુનો નોંધી તમામની ધરપકડ કરી રિમાન્ડ મેળવ્યા હતા. રિમાન્ડ પુરા થતાં ક્રાઈમ બ્રાંચે કોર્ટમાં રજૂ કર્યા હતા. કોર્ટના આદેશના પગલે રાજયની જુદી-જુદી જેલોમાં ધકેલી દેવાયા છે.
ક્રાઈમ બ્રાંચના સૂત્રોએ જણાવ્યું કે પેંડા ગેંગના બે-બે સભ્યોને સાબરમતી, સુરત, હિંમતનગર અને જામનગર, એક-એક સભ્યને દાહોદ અને મહેસાણા જયારે સૌથી વધુ પાંચ સભ્યોને ભાવનગર જેલ હવાલે કરાયા છે.
આ કેસની તપાસ હજી ત્રણ માસથી લઈ છ માસ સુધી ચાલશે. તપાસના અંતે ક્રાઈમ બ્રાંચ ચાર્જશીટ ફાઈલ કરશે. ગુજસીટોક હેઠળ આજીવન કેદની સજાની જોગવાઈ છે. પેંડા ગેંગ સાથે જ મંગળા મેઈન રોડ પર ફાયરિંગ કરનાર મુરગા ગેંગ સામે પણ ગુજસીટોક હેઠળ કાર્યવાહી તોળાઈ રહી છે.
