બોગસ સીમ કાર્ડ આપી પોલીસ પકડથી દૂર રાખતા હતા
એલસીબીએ રાધનપુરમાંથી રાજ્ય બહારનાં ૧૦૦૧ એક્ટિવ સીમકાર્ડ કબ્જે કર્યાં, બૂટલેગરના પુત્ર સહિત બેની અટક
જૂનાગઢ: ગુજસીટોકના ગુનામાં ફરાર બુટલેગરને બોગસ સીમકાર્ડ મોકલી પોલીસ પકડથી દૂર રાખવા માટે તેના પત્ની અને પુત્ર સહિતનાઓએ મદદગારી કરી હતી. આ મામલે એલસીબીએ ફરાર બુટલેગરના પત્ની, પુત્ર સહિત છ સામે ગુનો દાખલ કર્યો છે. રાધનપુર તપાસ દરમ્યાન અન્ય રાજ્યના એક્ટિવેટ ૧૦૦૧ બોગસ સીમકાર્ડ કબ્જે કર્યા હતા. એલસીબીએ ફરાર બુટલેગરના પુત્ર સહિત બે શખ્સની અટકાયત કરી વધુ પૂછપરછ હાથ ધરી છે.
આ અંગેની વધુ વિગત મુજબ જૂનાગઢ એલસીબીએ ગુજસીટોકના ગુનામાં ફરાર લિસ્ટેડ બુટલેગર ધિરેન કારીયાના પુત્ર પરમ ધિરેન કારીયાની દારૂના કેસમાં ધરપકડ કરી હતી. તેની તપાસ દરમ્યાન પરમ કારીયાના ફોનમાં સીમકાર્ડ અંગેની માહિતી મળી હતી જેના આધારે તપાસ કરતા પરમના વડોદરા રહેતા કુટુંબી મામા સંદિપ ઉર્ફે બંટી મારફત અન્ય રાજ્યના ત્રણ સીમ કાર્ડ ધરમ ઉર્ફે ધવલ વૃંદાવન મીઠીયાને મોકલ્યા હતા. આ ત્રણેય સીમકાર્ડ કબ્જે કરી બી ડીવીઝન પોલીસ સ્ટેશનમાં જાણવા જોગ રજીસ્ટર કરાવી હતી.
તપાસ દરમ્યાન ગુજસીટોકના ગુનામાં ફરાર ધિરેન કારીયાને પોલીસ પકડથી દુર રાખવા તેના પત્ની નિશાબેન ધિરેન કારીયા અને તેના પુત્ર પરમ ધિરેન કારીયાએ બીજા રાજ્યમાં ઠગાઈ કરી મેળવેલા સીમકાર્ડ કુટુંબી ભાઈ સંદિપ ઉર્ફે બંટી મારફત રાધનપુર તાલુકાના અમીપુરા ગામના ભરત શંકર પરમાર પાસેથી મેળવ્યા હોવાનું ખુલ્યું હતું. કુલ છ સીમકાર્ડમાંથી એક સીમકાર્ડ નિશાબેન કારીયાએ પોતાના મોબાઈલમાં રાખ્યું હતું. આ ફોન તેણે પોતાના કુટુંબી ભાઈ સંદિપ ઉર્ફે બંટી જગદિશ અઢીયા પાસેથી મંગાવ્યો હતો. બે સીમકાર્ડ પરમને આપ્યા હતા જે પરમે તેના સાથીદાર ધવલને સાચવવા આપ્યા હતા. નિશાબેને મેળવેલા સીમકાર્ડ પરથી ફરાર ધિરેન કારીયાએ વ્હોટસએપ ચાલુ કર્યું હતું. એલસીબીએ રાધનપુર તપાસ કરતા ભરત પરમાર પાસેથી ૧૦૦૧ એક્ટીવેટેડ સીમકાર્ડ મળી આવ્યા હતા તે કબ્જે કર્યા હતા. આ મામલે એલસીબીએ રાધનપુર તાલુકાના ભરત શંકર પરમાર, જૂનાગઢના પરમ ધિરેન કારીયા, નિશાબેન ધિરેન કારીયા, વડોદરાના સંદિપ ઉર્ફે બંટી જગદિશ અઢીયા, ઓરીસ્સાના ચંદનકુમાર મોહંતી અને આંધ્રપ્રદેશના વિજયવાડાના ભરત અંબુલા સામે આઈટી એક્ટ તેમજ ટેલીકોમ્યુનીકેશન એક્ટ મુજબ ગુનો દાખલ કરાવ્યો હતો. આ અંગેની તપાસ એસઓજીને સોંપવામાં આવી છે.
એલસીબીએ આ મામલે રાધનપુર તાલુકાના અમીપુરા ગામના ભરત શંકર પરમાર અને જૂનાગઢના લિસ્ટેડ બુટલેગરના પુત્ર પરમ ધિરેન કારીયાની અટકાયત કરી છે. બાકીના આરોપીઓની અટકાયત કરવા તજવીજ હાથ ધરી છે.
બોગસ સીમકાર્ડનું રાજ્યવ્યાપી રેકેટ હોવાની શક્યતા
એલસીબીએ રાધનપુરમાં તપાસ કરી ત્યાંથી અન્ય રાજ્યના ૧૦૦૧ એક્ટિવેટેડ સીમકાર્ડ સાથે ભરત શંકર પરમાર પકડાયો છે. આ સીમકાર્ડ આંધ્રપ્રદેશ તથા ઓરિસ્સા રાજ્યના છે. આટલા મોટા પ્રમાણમાં બોગસ સીમકાર્ડ મળી આવતા પોલીસ પણ ચોંકી ઉઠી હતી. આ બોગસ સીમકાર્ડનું રાજ્યવ્યાપી રેકેટ હોવાની સંભાવના છે જેથી જૂનાગઢ એસપીએ આ અંગેની તપાસ એસઓજીને સોંપી છે.
