વડોદરા, તા.26 શહેરના ગોત્રી વિસ્તારમાં આવેલી સોસાયટીના એક બંગલામાં કાર નીચે ચગડાઇ જતા દોઢ વર્ષની પુત્રીનું તેની શ્રમજીવી માતાની સામે જ કરૃણ મોત નિપજ્યું હતું.
આ અંગેની વિગત એવી છે કે મધ્યપ્રદેશના મૂળ વતની અને હાલ ન્યુ વીઆઇપીરોડ પર ભરવાડવાસમાં ભાડાના મકાનમાં રહેતા અરવિંદ દલસિંગ નીનામા પત્ની, પિતા તેમજ પરિવારના અન્ય સભ્યો સાથે આજે સવારે ગોત્રી રોડ પર ઇસ્કોન હાઇટ્સની સામે ગોત્રી કો.ઓ. હા.સો.માં સતિષભાઇ અગ્રવાલના બંગલામાં બાથરૃમના કામની મજૂરી માટે ગયા હતાં. પરિવારના સભ્યો કામ કરતા હતા જ્યારે અરવિંદની દોઢ વર્ષની પુત્રી ઇલીશા તેમજ તેની નાની બહેન બંને પાર્કિગમાં રમતા હતાં.
દરમિયાન સવારે ૧૦ વાગે બંગલાના માલિકનો ડ્રાઇવર અર્જુનસિંહ અમરસિંહ ચાવડા (રહે.મોટાભાગ, દરબારગઢ, સિંઘરોટ) પાર્કિંગમાં પડેલી કાર આગળ ચલાવતો હતો ત્યારે ત્યાં રમતી ઇલીશાના પગે કાર અથડાતા તે નીચે પડી ગઇ હતી અને કારનું વ્હિલ શરીર પર ફરી વળ્યું હતું. આ ઘટના તેની માતા રીમાએ જોતા જ બૂમાબૂમ કરી હતી અને કામ કરતા પરિવારના સભ્યો દોડી આવ્યા હતાં. બાળકીને તાત્કાલિક હોસ્પિટલમાં લઇ જવાઇ હતી પરંતુ તેનું મોત નિપજ્યું હતું. આ અંગે અરવિંદ નીનામાની ફરિયાદના આધારે ગોત્રી પોલીસે ગુનો નોંધી ચાલક અર્જુનસિંહની અટકાયત કરી હતી.
