વડોદરાઃ વડોદરામાં ગત વર્ષે સ્માર્ટ મીટરને લઈને સર્જાયેલા વિરોધ વંટોળ બાદ મધ્ય ગુજરાત વીજ કંપની હવે સ્માર્ટ મીટર નાંખવા માટે ઉતાવળ નથી કરી રહી.આમ છતા છાશવારે સ્માર્ટ મીટરનો વિરોધ થતો રહે છે.
શહેરના ગોરવા વિસ્તારમાં આવેલા સત્યમ એપાર્ટમેન્ટમાં વીજ કંપનીની ટીમ જૂના મીટર બદલીને સ્માર્ટ મીટર નાંખવા પહોંચી હતી.સ્થાનિક રહેવાસીઓનું કહેવું છે કે, વીજ કંપની દ્વારા કોઈ પણ પ્રકારની પૂર્વ જાણકારી આપવામાં આવી નહોતી અને અહીંના રહેવાસીઓની સંમતિ પણ લેવામાં આવી નહોતી.
એક તબક્કે સ્થાનિક લોકોને વીજ કંપનીની ટીમ સાથે બોલાચાલી પણ થઈ હતી.લોકોએ કહ્યું હતું કે, એપાર્ટમેન્ટના લોકો નિયમિત બિલ ચૂકવી રહ્યા છે ત્યારે કોઈ કારણ વગર મીટર બદલવાનો નિર્ણય સમજમાં આવતો નથી.
લોકોના વિરોધ બાદ વીજ કંપનીની ટીમ મીટર બદલ્યા વગર જ રવાના થઈ હતી.લોકોએ કહ્યું હતું કે, વીજ કંપનીએ મીટર બદલતા પહેલા લેખિત નોટિસ, યોગ્ય કારણ આપીને કાર્યવાહી કરવી જોઈએ.
