મુંબઈ : અમેરિકા દ્વારા ટેરિફ વોરને કારણે ટ્રેડરો ડોલરના વિકલ્પ તરીકે કિંમતી ધાતુ તરફ નજર દોડાવી રહ્યા હોવાથી સપ્તાહ અંતે વૈશ્વિક બજારમાં સોનાચાંદી સહિતની કિંમતી ધાતુ નોંધપાત્ર સુધારા સાથે બંધ રહી હતી. વિશ્વ બજાર પાછળ મુંબઈમાં બંધ બજારે ભાવ ઊંચા બોલાતા હતા. ચાંદીમાં બંધ બજારે રૂપિયા ૧,૧૨,૦૦૦થી વધુની નવી ઊંચી સપાટી જોવા મળી હતી. ડોલર પણ ખાનગીમાં મજબૂત રહ્યો હતો. ક્રુડ તેલની માગને લઈને ઈન્ટરનેશનલ એનર્જી એજન્સી (આઈઈએ)ના નિવેદન બાદ ક્રુડ તેલના ભાવ પણ સપ્તાહ અંતે ઊંચા બંધ રહ્યા હતા.
