– ડોલર ઈન્ડેક્સ વધતાં વૈશ્વિક સોના-ચાંદીના ભાવ ઘટયા
– વિશ્વ બજારમાં પ્લેટીનમ તથા પેલેડીયમમાં પણ કડાકો બોલાયો: ક્રૂડતેલના ભાવ 61 ડોલરને પાર
મુંબઈ : મુંબઈ ઝવેરી બજારમાં આજે સોના-ચાંદીના ભાવમાં તેજીને બ્રેક લાગી હતી તથા ભાવ ઉંચી ટોચ પરથી ઝડપી ગબડતા જોવા મળ્યા હતા. વિશ્વ બજારના સમાચાર કિંમતી ધાતુઓમાં તેજીની પીછેહટ દર્શાવી રહ્યા હતા. વિશ્વ બજાર ટોચ પરથી નીચી ઉતરતાં સ્થાનિક બજારોમાં આયાત થતા સોના-ચાંદીની ઈમ્પોર્ટ કોસ્ટ નીચી ઉતરતાં ઘરઆંગણે ઝવેરી બજારોમાં વેચનારા વધુ અને લેનારા ઓછા જેવી સ્થિતિ સર્જાઈ હતી. દરમિયાન, વિશ્વ બજાર પાછળ ઘરઆંગણે અમદાવાદ ઝવેરી બજારમાં સોનાના ભાવ ૧૦ ગ્રામના રૂ.૧૦૦૦ તૂટયા હતા જ્યારે ચાંદીના ભાવ કિલોના રૂ.૮૦૦૦ ગબડતાં બજારના ખેલાડીઓ સ્તબ્ધ થઈ ગયા હતા.
દરમિયાન, વિશ્વ બજારમાં આજે સોનાના ભાવ ઔંસના ૪૪૧૦થી ૪૪૨૫ ડોલરથી ઘટી નીચામાં ભાવ ૪૪૦૦થી ૪૪૦૮ ડોલર રહ્યા હતા. વિશ્વ બજારમાં ડોલર ઈન્ડેક્સ વધતાં વૈશ્વિક સોનામાં ઉછાળે ફંડોની વેચવાલી જોવા મળી હતી. સોના પાછળ વૈશ્વિક ચાંદીના ભાવ ઔંસના ૭૮.૭૮થી ૭૮.૭૯ ડોલરવાળા નીચામાં ભાવ ૭૪.૦૨ થઈ ૭૪.૦૨થી ૭૪.૦૮ ડોલર રહ્યા હતા.
અમદાવાદ બજારમાં સોનાનિા ભાવ ગબડી ૧૦ ગ્રામના ભાવ ૯૯૫ના રૂ.૧૪૦૨૦૦ તથા ૯૯૯ના ભાવ રૂ.૧૪૦૫૦૦ બોલાઈ ગયા હતા. જ્યારે અમદાવાદ ચાંદીના ભાવ ગબડી કિલોના રૂ.૨૩૮૦૦૦ બોલાઈ ગયા હતા.
દરમિયાન, મુંબઈ બુલિયન બજારમાં સોનાના ભાવ જીએસટી વગર ૯૯૫ના રૂ.૧૩૬૧૨૮ વાળા તૂટી રૂ.૧૩૪૯૦૧ થઈ રૂ.૧૩૫૨૨૯ રહ્યા હતા. જ્યારે ૯૯૯ના ભાવ રૂ.૧૩૬૬૭૫ વાળા નીચામાં ભાવ ૧૩૫૪૪૩ થઈ રૂ.૧૩૫૭૭૩ રહ્યા હતા. મુંબઈ ચાંદીના ભાવ જીએસટી વગર રૂ.૨૪૮૦૦૦ વાળા રૂ.૨૩૫૭૭૫ થઈ રૂ.૨૩૫૮૨૬ રહ્યા હતા. મુંબઈ સોના-ચાંદીમાં જીએસટી સાથેના ભાવ આ ભાવથી ૩ ટકા ઉંચા રહ્યા હતા. વિશ્વ બજારમાં આજે પ્લેટીનમના ભાવ ઔંસના ૨૩૩૫થી ૨૩૩૬ વાળા તૂટી નીચામાં ભાવ ૨૧૭૭૨થી ૨૧૭૩ થઈ ૨૧૯૧થી ૨૧૯૨ ડોલર રહ્યા હતા. પેલેડીયમના ભાવ ૧૭૫૪થી ૧૭૫૫ વાળા આજે નીચામાં ભાવ ૧૭૦૩ થઈ ૧૭૨૭થી ૧૭૨૮ ડોલર રહ્યા હતા.
દરમિયાન, વૈશ્વિક કોપરના ભાવ આજે વધુ ૦.૧૯ ટકા નરમ રહ્યા હતા. જોકે ક્રૂડતેલના ભાવ આંચકા પચાવી ફરી વધ્યા હતા. વેનેઝુએલામાં ઉત્પાદન ઘટયાના વાવડ હતા. વિશ્વ બજારમાં બ્રેન્ટક્રૂડના ભાવ બેરલના વધી ઉંચામાં ૬૦.૯૬ થઈ ૬૦.૯૨ ડોલર રહ્યા હતા. જ્યારે યુએસ ક્રૂડના ભાવ વધી ૫૬.૯૪ થઈ ૫૬.૮૯ ડોલર રહ્યા હતા. મુંબઈ ચાંદીના ભાવ આજે ટોચ પરથી કિલોના રૂ.૧૨ હજાર તૂટી જતાં ખેલાડીઓમાં ખાસ્સી ચકચાર જાગી હતી.
