અમદાવાદ, શનિવાર
ગાંધીનગર સ્ટેટ સાયબર ક્રાઇમ સેલના સ્ટાફે છેતરપિંડીથી મેળવેલા રૂપિયા ૧૦ કરોડ ઉપરાંતની રકમને છેલ્લાં ચાર મહિનામાં પાકિસ્તાન મોકલનાર આરોપીને ઝડપીને મહત્વની સફળતા મેળવી છે. સુરતના કામરેજમાં રહેતા યુવકે ગુજરાતના અન્ય એજન્ટો સાથે મળીને બેંક એકાઉન્ટમાંથી છેતરપિંડીના નાણાં મેળવીને પાકિસ્તાનથી ચાઇનીઝ ગેંગને મોકલવાનું કૌભાંડ આચર્યું હતું.
કમ્બોડિયા અને મ્યાંનમારમાં સક્રિય ચાઇનીઝ ગેંગ દ્વારા આચરવામાં આવતી છેતરપિંડીથી ગુજરાતના વિવિધ શહેરોની બેંકમાં જમા થતી રકમને રોકડમાં ઉપાડીને તેમજ ઓનલાઇન તે નાણાંને પાકિસ્તાન અને દુબઇ સ્થિત એજન્ટોને મોકલવાના કૌભાંડમાં રાજ્યના અનેક શખ્સો સક્રિય હોવાની બાતમી સ્ટેટ સાયબર ક્રાઇમના એસપી ડૉ. રાજદીપસિંહ ઝાલાને મળી હતી. જેના આધારે વોચ ગોઠવીને સુરતના કામરેજમાં ચેતન ગાંગાણીને ઝડપી લીધો હતો. પ્રાથમિક તપાસમાં જાણવા મળ્યું હતું કે ચેતન ગાંગાણી તેના ક્રિપ્ટો વોલેટથી યુએસડીટીમાં રૂપિયા ૧૦ કરોડ ઉપરાંતની રકમ ચાર મહિનાના સમયગાળામાં પાકિસ્તાન સ્થિત એજન્ટોને ટ્રાન્સફર કરી હતી. જેના બદલામાં ચાઇનીઝ ગેંગ ચોક્કસ કમિશન આપતી હતી. આરોપીઓએ ગુજરાતના વિવિધ શહેરોમાં ભાડેથી અનેક લોકોના એકાઉન્ટ ખોલાવીને તેમાં કરોડો રૂપિયા જમા કરાવ્યા હતા.આ અંગે પોલીસે વધુ તપાસ શરૂ કરી છે.
