વડોદરા,વડોદરા જેલના કેદીઓને કોર્ટ સમક્ષ રજૂ કરવા માટે હવે વીડિયો કોન્ફરન્સની સુવિધા શરૃ કરાઇ છે. તેના માટે વડોદરા જેલમાં સાઉન્ડ પ્રૂફ કન્ટેનરના ૯ રૃમ બનાવાયા છે. જેમાં કેદીઓને હાજર રાખી કોર્ટ સમક્ષ તેઓની હાજરી પુરવામાં આવે છે. છેલ્લા એક મહિનાથી જેલના ૯૧ ટકા કેદીઓને વીડિયો કોન્ફરન્સથી રજૂ કરાય છે.
વડોદરાની મધ્યસ્થ જેલમાં હાલ અંદાજે ૧,૭૦૦ કેદીઓ છે. જે પૈકી મોટાભાગના કેદીઓ કાચાકામના છે. કાચા કામના કેદીઓને દર ૧૫ દિવસે કોર્ટ સમક્ષ રજૂ કરવાના હોય છે. આ કેદીઓને કોર્ટમાં લઇ જવા અને પરત લાવવા માટે પોલીસ જવાનોનો જાપ્તો મોકલવામાં આવતો હોય છે. રોજના અંદાજે ૩૦ પોલીસ જવાનો તેમજ બે પી.એસ.આઇ. ને જાપ્તાની ડયૂટિ સોંપવામાં આવતી હોય છે. જેની પાછળ લાખો રૃપિયાનો ખર્ચ થાય છે. જોકે, હવે વડોદરા જેલમાંથી હવે વીડિયો કોન્ફરન્સ દ્વારા કેદીઓને કોર્ટ સમક્ષ રજૂ કરવાનું શરૃ કરાયું છે. તેના માટે અલાયદા રૃમ પણ બનાવાયા છે. એક રૃમમાં બે વીડિયો કેમેરા હોય છે. તેના મારફતે કોર્ટ સમક્ષ આરોપીની હાજરી પુરવામાં આવે છે. હાલ ૧,૫૪૭ કેદીઓને વીડિયો કોન્ફરન્સ થકી કોર્ટ સમક્ષ રજૂ કરાય છે. આ અંગે જેલ સુપ્રિન્ટેન્ડન્ટ ઉષા રાડાએ જણાવ્યું છે કે, વીડિયો કોન્ફરન્સ સિસ્ટમના કારણે સમય અને ખર્ચનો વ્યય અટક્યો છે. રાજ્યના પોલીસ વડા દ્વારા પણ શક્ય તેટલા વધુ કેદીઓને વીડિયો કોન્ફરન્સથી રજૂ કરવાની તાકીદ કરાઇ છે.
વીડિયો કોન્ફરન્સના કારણે લાખો રૃપિયાનો ખર્ચ અને સમયની બચત
વડોદરા,
હજી કેટલાક કેસ એવા હોય છે કે,જેમાં કેદીઓની કોર્ટ રૃબરૃની જુબાની લેવાની હોય છે. જેથી, તેઓને કોર્ટ રૃબરૃ હાજર કરવા જરૃરી હોય છે. તેવા કિસ્સામાં હજી જાપ્તા ચાલુ છે. અગાઉ ૩૦ ની જગ્યાએ હવે રોજના માત્ર પાંચ જવાનો તેમજ એક પી.એસ.આઇ. ની જરૃરિયાત પડે છે. જાપ્તાના સ્ટાફના પગાર તેમજ વાહન પાછળ થતો ખર્ચ બચી ગયો છે. જેના કારણે પોલીસ તંત્રના લાખો રૃપિયાના ખર્ચની બચત થઇ છે.
પોલીસ જાપ્તામાંથી કેદીઓના ભાગી જવાનું જોખમ ટળ્યું
વડોદરા,
વડોદરા શહેર, જિલ્લા ઉપરાંત અન્ય જિલ્લાના કેદીઓ પણ વડોદરાની જેલમાં કાચા કામના કેદીઓ તરીકે છે. તેઓના જાપ્તામાં મોટી રાહત મળી છે. તેઓને જાપ્તા હેઠળ બહારગામ લઇ જવા માટે પોલીસને ખૂબ સાવચેતી રાખવી પડે છે. તેમજ આવા કિસ્સામાં કેદીઓ ભાગી ના જાય તેની ખાસ સતર્કતા રાખવી પડે છે. વીડિયો કોન્ફરન્સ સિસ્ટમના કારણે જેલથી કોર્ટ સુધી કેદીઓને લઇ જતા સમયે તેઓના ભાગી જવાનું જોખમ પણ રહેતું નથી.
