Chhota Udaipur News: છોટા ઉદેપુર જિલ્લાના કવાંટ-નસવાડી રોડ પર ભયાવહ અકસ્માતની ઘટના સામે આવી છે. ડણી ગામના બસ સ્ટેન્ડ નજીક એક પૂરપાટ ઝડપે આવી રહેલી ઈકો કાર અને બાઈક વચ્ચે ભયંકર ટક્કર થઈ હતી. આ અકસ્માતમાં બાઈક પર સવાર પતિ-પત્ની બંનેના ઘટનાસ્થળે જ કરુણ મોત નીપજ્યા છે. અકસ્માત એટલો ગંભીર હતો કે કારના બોનેટના ભાગ સહિત બાઈકના ફુરચેફુરચા ઉડી ગયા હતા અને રાહદારીઓ ઘટનાસ્થળે દોડી આવ્યા હતા.
પરિવારજનો અને ગ્રામજનો આઘાતમાં
પ્રાથમિક માહિતી પ્રમાણે જામ્બા ગામના વતની ભૂપેન્દ્ર રાઠવા ગઢ બોરિયાદ ગામના સામુહિક આરોગ્ય કેન્દ્ર (CHC) ખાતે ફરજ બજાવતા હતા. તેઓ પોતાની નોકરી પૂરી કરીને પત્ની સુનિતાબેન રાઠવા સાથે બાઈક પર પરત ઘરે જઈ રહ્યા હતા, તે દરમિયાન ડણી ગામના બસ સ્ટેન્ડ પાસે કાળમુખી ઈકો કારે તેમની બાઈકને અડફેટે લીધી હતી. આ અકસ્માતમાં સુનિતાબેનને માથાના ભાગે અત્યંત ગંભીર ઈજાઓ પહોંચતા તેમણે તેમના પતિ ભૂપેન્દ્રભાઈ સાથે ઘટનાસ્થળે જ જીવ ગુમાવ્યો હતો. દંપતીના અચાનક મોતના સમાચારથી જામ્બા ગામ સહિત સમગ્ર પંથકમાં શોકનો માહોલ છે.
આ પણ વાંચો: વડોદરાઃ ડભોઈના ભાજપ ધારાસભ્યની ઘોડાની લગામ બુટલેગરના હાથમાં, સાંઠગાંઠના પુરાવા કોર્ટમાં રજૂ
ઘટનાની જાણ થતાં જ નસવાડી પોલીસનો કાફલો તાત્કાલિક ઘટનાસ્થળે પહોંચી ગયો હતો. પોલીસે બંને મૃતદેહોને કબજો મેળવીને પોસ્ટમોર્ટમ અર્થે નસવાડી સિવિલ હોસ્પિટલ ખાતે ખસેડવાની તજવીજ હાથ ધરી હતી. પોલીસે અકસ્માતે ગુનો નોંધીને કાર ચાલક સામે કાયદેસરની કાર્યવાહી શરૂ કરી આગળની તપાસ હાથ ધરી છે
