Jamnagar Fire Brigade : જામનગર શહેર અને આસપાસના હાઇવે રોડ પર આવેલી હોટલ, ઢાબા અને રેસ્ટોરન્ટોમાં ફાયર સુરક્ષા તથા બાંધકામ સંબંધિત નિયમોનું પાલન થાય છે કે નહીં, તેની તપાસ માટે મહાનગરપાલિકાની ફાયર શાખા સહિતની વિવિધ શાખાઓ દ્વારા બે દિવસથી તાબડતોબ ચકાસણી હાથ ધરવામાં આવી છે. આ અભિયાન અંતર્ગત કુલ નવ હોટલ અને રેસ્ટોરન્ટને સીલ કરવામાં આવ્યા છે, જ્યારે અનેક સંચાલકોને નિયમોનું પાલન કરવા માટે નોટિસ પાઠવવામાં આવી છે.
પ્રાપ્ત વિગતો મુજબ ચકાસણીના પ્રથમ દિવસે છ હોટલ અને રેસ્ટોરન્ટમાં ગંભીર અનિયમિતતાઓ સામે આવતાં તંત્ર દ્વારા તાત્કાલિક અસરથી સીલ કરવાની કાર્યવાહી કરવામાં આવી હતી. ત્યારબાદ બીજા દિવસે, એટલે કે બુધવારે, વધુ ત્રણ એકમોમાં પણ જરૂરી ફાયર સુરક્ષા સાધનો અને મંજૂરીઓના અભાવને કારણે સીલ મારવામાં આવ્યા હતા.
ચકાસણી દરમિયાન કેટલાક સ્થળોએ ફાયર સુરક્ષા માટેની વ્યવસ્થાઓ અપૂર્ણ અથવા બિનકાર્યરત હાલતમાં જોવા મળતા સંચાલકોને કડક સૂચના સાથે નોટિસ આપવામાં આવી છે. મહાનગરપાલિકાના અધિકારીઓએ સ્પષ્ટ કર્યું છે કે જાહેર સલામતીને પ્રથમ પ્રાથમિકતા આપતા આવી કાર્યવાહી આગળ પણ સતત ચાલુ રહેશે. તંત્ર દ્વારા શહેર અને હાઇવે વિસ્તારના તમામ હોટલ-રેસ્ટોરન્ટ સંચાલકોને નિયમોનું કડક પાલન કરવા સૂચના આપવામાં આવી છે, નહીં તો આગામી સમયમાં વધુ કડક કાર્યવાહી હાથ ધરાશે.
