Jamnagar Crime : જામનગરમાં નેશનલ સોસાયટી વિસ્તારમાં ગઈકાલે દરજી કામ કરતા એક યુવાનને બોલાવી સાથે લઈ જઈ ત્રણ શખ્સોએ માર માર્યો હતો, અને તેની પાસેથી રૂપિયા 7,000 ની રોકડ રકમ ઝુંટવી ગયા હતા, જે મામલે પોલીસ ફરિયાદ નોંધાવાઇ છે.
આ ફરિયાદ અંગેના બનાવની વિગત એવી છે કે જામનગરમાં લાલવાડી આવાસમાં રહેતા અને દરજી કામ કરતા અજય રમેશભાઈ દાઉદ્રા નામના 27 વર્ષના યુવાને પોતાના ઉપર હુમલો કરી પોતાની પાસેથી રૂપિયા 7,000ની રોકડ રકમ ઝુંટવી લેવા અંગે લાલવાડી આવાસ વિસ્તારમાં જ રહેતા સલીમ સુમરા, પ્રશાંત ઉર્ફે ટકો ડાંગર, અને માસુમ માડકિયા સામે ફરિયાદ નોંધાવી છે.
પોલીસ ફરિયાદમાં જાહેર કરાયા અનુસાર ફરીયાદી યુવાન તેના મિત્ર વિવેક સાથે ફરતો હોવાથી વિવેક અને આરોપીઓને ઝઘડો થયો હોવાના કારણે તું વિવેકની સાથે શું કામ ફરે છે, અને વિવેકને બોલાવી દે તેમ કહેતાં ફરીયાદી દરજી યુવાને ના પાડી હતી.
જેથી ત્રણેય આરોપીઓ ઉસ્કેરાઈ ગયા હતા, અને હુમલો કરી દઈ સાત હજાર રૂપિયા ની રોકડ રકમ ઝુંટવી લીધી હતી, તેથી મામલો સીટી એ. ડિવિઝન પોલીસ મથકમાં લઈ જવાયો છે, અને પોલીસ ત્રણેય હુમલાખોર આરોપીઓને શોધી રહી છે.
