Jamnagar Accident : જામનગર-રાજકોટ ધોરી માર્ગ પર હાપા નજીક ગઈકાલે સાંજે એક ટેન્કર ચાલકે સાયકલ સવાર બુઝુર્ગને કચડી નાખ્યા હતા, અને અંતરિયાળ મૃત્યુ નીપજતાં ભારે અરેરાટી ફેલાઈ હતી ટેન્કર હેઠળ કચડાઈ જવાના સીસીટીવી ફુટેજ ગઈકાલે જામનગરના સોશિયલ મીડિયામાં ફરતા થયા હતા.
આ અકસ્માતના બનાવની વિગત એવી છે કે જામનગરમાં શીતલ પાર્ક સોસાયટીમાં રહેતા લક્ષ્મણભાઈ ગઢવાણા નામના 75 વર્ષના પ્રજાપતિ જ્ઞાતિના બુઝુર્ગ કે જેઓ ગઈકાલે બપોરે એકાદ વાગ્યાના અરસામાં હાપા રોડ પરથી પોતાની સાઇકલ લઈને એક ધાર્મિક પ્રસંગમાં હાજરી આપવા જઈ રહ્યા હતા, તે દરમિયાન પૂરપાટ ઝડપે આવી રહેલા એક અજાણ્યા ટ્રક ટેન્કરના ચાલકે તેઓને હડફેટમાં લઈ કચડી નાખતાં ગંભીર ઇજા થવાના કારણે ઘટના સ્થળે જ કમકમાટી ભર્યું મૃત્યુ નીપજયું હતું.
જે અકસ્માત સીસીટીવી કેમેરામાં કેદ થયો હતો અને ટેન્કર ચાલકે તેઓને કચડી નાખતાં માથું ચેપાઈ ગયું હતું, અને ભારે રક્તસ્ત્રાવ થઈ જવાથી તેઓનું મૃત્યુ નીપજ્યું હતું. જેના સીસીટીવી ફૂટેજ ગઈકાલે શહેરભરમાં વાયરલ થયા હતા.
ઉપરોક્ત અકસ્માતના બનાવ અંગે મૃતક લક્ષ્મણભાઈના પુત્ર રમેશભાઈ ગઢવાણાએ જામનગરના પંચકોશી બી. ડિવિઝન પોલીસ મથકમાં પોતાના પિતાનું મૃત્યુ નીપજાવવા અંગે અજાણ્યા ટેન્કરચાલક સામે ફરિયાદ નોંધાવતાં પોલીસે સમગ્ર મામલામા તપાસ હાથ ધરી છે.
