સ્થાનિક તંત્રને ઊંઘતું રાખી રાજકોટ ફ્લાઈંગ સ્ક્વોડ ત્રાટકી
રોયલ્ટી ભર્યા વગર બેલા પથ્થર, લાઇમસ્ટોન, બ્લેકટ્રેપ, રેતી અને હાર્ડ મોરમની હેરફેર કરતા ૧૨ ટ્રક ઝડપાયા
રાજકોટ: જૂનાગઢ અને જામનગરમાં ખનીજચોરી બદલ રૂ.૨.૧૫ કરોડનો મુદ્દામાલ સીઝ કરવામાં આવ્યો છે. જેમાં રોયલ્ટી ભર્યા વગર બેલા પથ્થર, લાઇમસ્ટોન, બ્લેકટ્રેપ, રેતી અને હાર્ડ મોરમની હેરફેર કરતા ૧૨ ટ્રક ઝડપાયા હતા. ખાસ તો રાજકોટ ફ્લાઈંગ સ્ક્વોડની ટીમ તમામ જગ્યાએ ત્રાટકી હતી, જેથી સ્થાનિક તંત્ર વધુ એક વખત ઊંઘતું કે આંખ આડા કાન કરતું ઝડપાતા ચકચાર મચી જવા પામી છે. હવે સ્થાનિક ભ્રષ્ટ તંત્ર સામે ગાંધીનગરથી કોઈ મોટા પગલાં લેવાય છે કે કેમ, તેના પર સૌની મીટ મંડાઈ છે.
રાજકોટ સ્થિત મદદનીશ ફ્લાઈંગ સ્ક્વોડ નિયામક કચેરીની ટીમને બાતમી મળતા જૂનાગઢ જિલ્લા કચેરીને સાથે રાખીને અલગ અલગ જગ્યાએ વોચ ગોઠવવામાં આવી હતી. જેમાં સ્થાનિક ખાણ-ખનીજ વિભાગ અને વહીવટી તંત્રની નાક નીચે લાંબા સમયથી બેલા પથ્થર, લાઇમસ્ટોન, બ્લેકટ્રેપ, સાદી રેતી અને હાર્ડ મોરમનું ગેરકાયદેસર પરિવહન ચાલી રહ્યું હોવાનો ભાંડો ફૂટયો હતો. જૂનાગઢ જિલ્લામાં અલગ-અલગ ત્રણ સ્થળોએ આકસ્મિક ચેકિંગ હાથ ધરીને કુલ ૯ વાહનો ઝડપી લીધા હતા. કેશોદના દીવરાણા ધાર પાસેથી બિલ્ડિંગ લાઇમસ્ટોનનું કોઈપણ જાતના રોયલ્ટી પાસ વગર ગેરકાયદેસર વહન કરતા ૬ ડમ્પરો ઝડપાયા હતા. આ મુદ્દામાલની કિંમત આશરે રૂા.૬૫ લાખ આંકવામાં આવી છે. જે તમામ વાહનોને કેશોદ ખાતેના સ્ટોન ક્રશરમાં સીઝ કરી કસ્ટડી સોંપાઈ હતી. જ્યારે મેંદરડા ખાતેથી સાદી રેતી અને બ્લેકટ્રેપ ખનીજનું ગેરકાયદે વહન કરતા ૨ ડમ્પરો ઝડપાયા હતા. આશરે રૂા.૩૦ લાખનો આ મુદ્દામાલ જપ્ત કરી વાહનોને મેંદરડા પોલીસ સ્ટેશન ખાતે સીઝ કરવામાં આવ્યા હતા. આ ઉપરાંત વંથલી ખાતેથી હાર્ડ મોરમ ખનીજ ભરેલી ૧ ટ્રક રોયલ્ટી પાસ વગર પસાર થતા ઝડપાઈ હતી. રૂા.૩૦ લાખની કિંમતના આ વાહનને સીઝ કરી ગાદોઈ ખાતે કસ્ટડીમાં સોંપવામાં આવ્યું છે.
રાજકોટ ફ્લાઈંગ સ્ક્વોડની નજર માત્ર જૂનાગઢ પર જ નહીં, પણ જામનગર જિલ્લા પર પણ હતી. જામનગરના ધ્રોલ તાલુકામાં તપાસ દરમિયાન ટીમ ત્રાટકી હતી અને ત્યાંથી બ્લેકટ્રેપ ખનીજનું રોયલ્ટી પાસ વગર ગેરકાયદે વહન કરતા કુલ ૩ વાહનો ઝડપી પાડયા હતા. આ ત્રણેય વાહનોને તાત્કાલિક અસરથી સીઝ કરી ધ્રોલ પોલીસ સ્ટેશનની કસ્ટડીમાં સોંપી દેવામાં આવ્યા હતા. આમ, કુલ રૂા.૨.૧૫ કરોડનો મુદ્દામાલ સીઝ કરીને કાયદેસરની દંડાત્મક અને કોર્ટ કાર્યવાહીની પ્રક્રિયા ચાલુ કરાઈ છે.
