Rahul Gandhi: કોંગ્રેસ નેતા રાહુલ ગાંધી હાલમાં સંગઠનને મજબૂત બનાવવામાં વ્યસ્ત છે. આ અંતર્ગત, તેઓ મંગળવારે મધ્યપ્રદેશ ગયા હતા અને બુધવારે હરિયાણા બેઠક માટે પહોંચ્યા હતા. ગયા વર્ષે વિધાનસભા ચૂંટણી પછી રાહુલ ગાંધીનો હરિયાણાનો આ પહેલો પ્રવાસ હતો. આ દરમિયાન તેમણે રાજ્ય કાર્યાલયમાં બધા નેતાઓને એકસાથે બેસાડ્યા, જેમના જૂથવાદની ચર્ચા થઈ છે. તેમજ ચૂંટણીમાં હાર બાબતે પણ ચર્ચા કરવામાં આવી હતી.
જીતના 100 બાપ હોય છે, હારનો કોઈ નથી: હુડ્ડા
ચૂંટણીમાં થયેલી હાર વિશે કોઈએ ખુલ્લીને વાત કરી ન હતી, પરંતુ બધું જ કટાક્ષમાં કહેવામાં આવ્યું હતું. ભૂપિન્દર સિંહ હુડ્ડા, જેમણે ચૂંટણી પ્રચારનું નેતૃત્વ કર્યું હતું અને મુખ્યમંત્રી પદની રેસમાં હતા, તેમને કુમારી શેલજાના નેતૃત્વ હેઠળના જૂથે દોષી ઠેરવ્યા. હુડ્ડા આનાથી દુઃખી થયા હોય તેવું લાગ્યું અને કટાક્ષભર્યા સ્વરમાં કહ્યું, ‘જીતના 100 બાપ હોય છે, હારનો કોઈ નથી.’ હુડ્ડાએ ચૂંટણીનો ઉલ્લેખ પણ કર્યો ન હતો, પરંતુ તેમના શબ્દો પરથી સ્પષ્ટ હતું કે તેઓ ચૂંટણી પરિણામો પછીથી ચાલી રહેલા દોષના ખેલ પર પોતાનો પક્ષ મૂકવા માંગતા હતા.
આ પણ વાંચો: જ્યારે દીકરાએ ખુદ ઓપરેશન સિંદૂર અંગે શશી થરુરને પૂછ્યો સવાલ, જાણો શું જવાબ મળ્યો
જે કંઈ થઈ રહ્યું છે એનો જવાબદાર હું જ છું: રાહુલ ગાંધી
રાહુલ ગાંધીએ તરત જ હુડ્ડાની આ વાતનો જવાબ આપ્યો. મીડિયા અહેવાલ મુજબ, રાહુલ ગાંધીએ હુડ્ડાના નિવેદનનો પોતાની શૈલીમાં જવાબ આપ્યો અને કહ્યું કે, ‘જે કંઈ પણ થઈ રહ્યું છે, તેનો હું જ બાપ-દાદા છું…. દરેક વસ્તુ માટે હું જવાબદાર છું.’
રાહુલ ગાંધીની આ ટિપ્પણી મહત્ત્વપૂર્ણ હતી કારણ કે તેમણે ગુજરાતથી મધ્યપ્રદેશ સુધીના પોતાના પક્ષના નેતાઓ પર પ્રહારો કર્યા છે. ગુજરાતમાં, તેમણે ઘણા કોંગ્રેસના નેતાઓને ભાજપના સ્લીપર સેલ કહ્યા. પછી મધ્યપ્રદેશમાં, તેમણે ઘણા રાજ્યના નેતાઓને બારાત કા ઘોડા કહ્યા અને કહ્યું કે તેમના પર ભરોસો કરીને રેસ જીતી શકાતી નથી.
