Vadodara Fraud Case : ઇન્વેસ્ટમેન્ટના નામે બોગસ વેબસાઈટ તેમજ બોગસ ડિજિટલ એકાઉન્ટ બનાવી અનેક ઘણો નફો બતાવીને છેતરપિંડી કરવાના બનાવો સતત બની રહ્યા છે ત્યારે આ જ પ્રકારના વધુ એક બનાવવામાં વડોદરાના યુવકે રૂ.26 લાખ ગુમાવ્યા છે.
વડોદરાના બિલ વિસ્તારમાં સત્યમ ટેનામેન્ટ ખાતે રહેતા અને ખાનગી કંપનીમાં ભરત બજાવતા દીપકભાઈ રાજે પોલીસને કહ્યું છે કે, ગઈ તા.12મી ડિસેમ્બરે મારે ફેસબુક પર બ્રમ્હી કપાસિયા નામની યુવતીનો સંપર્ક થયો હતો. ચેટ દ્વારા વાતચીત કરી સ્ટોક માર્કેટમાં રોકાણ કરવા માટે સલાહ આપી હતી.
ત્યારબાદ યુવતીએ એક મોબાઈલ નંબર મોકલ્યો હતો. જેના પર મેં વાત કરતા મને એક લિંક મોકલવામાં આવી હતી અને આ લિંક દ્વારા વોટ્સએપ ગ્રુપમાં જોઈન્ટ કરવામાં આવ્યો હતો. જેમાં મને આઇપીઓની માહિતી આપવામાં આવતી હતી. ત્યારબાદ મને બીજા એક ગ્રુપમાં જોઈન કરવામાં આવ્યો હતો. મારું વેબસાઈટ ઉપર ક્યુ.આઈ.બી સ્ટોક માર્કેટનો એકાઉન્ટ પણ ખોલવામાં આવ્યું હતું.
યુવકે પોલીસને કહ્યું છે કે, થોડા સમય પછી વેબસાઈટ બદલાઈ ગઈ હતી અને આ સાઇટ ઉપર મારી પાસે રજીસ્ટ્રેશન કરાવી એકાઉન્ટ એક્ટિવેટ કરાવવામાં આવ્યું હતું. ત્યારબાદ મને સાઈટ મારફતે કસ્ટમર સપોર્ટમાં લઈ જવાયો હતો જેમાં એક બેંક એકાઉન્ટ આપવામાં આવ્યો હતો. તા 22મી ડિસેમ્બરે મેં રૂ.10 હજાર ભરી ટ્રેડિંગ કરતા મારા ખાતામાં રૂ.11972 જમા થયા હતા. જે રકમ મેં ઉપાડીને મારા એકાઉન્ટમાં ટ્રાન્સફર કરી હતી.
યુવકે કહ્યું છે કે ત્યારબાદ મેં 12,000 ડિપોઝિટ કરાવી ટ્રેડિંગ કર્યું હતું. મને વિશ્વાસ આવી જતા ટુકડે ટુકડે કુલ રૂ 26 લાખ જેટલી રકમ જમા કરાવી હતી.પરંતુ મારી ડિપોઝિટ કરેલી રકમની સામે માત્ર મને અત્યાર સુધી 16 હજાર રૂપિયા જ મળ્યા છે.મારા ખાતામાં 39.85 લાખનું બેલેન્સ દેખાતું હોવા છતાં મને રૂપિયા પરત મળતા નથી. ઓનલાઇન ઠગોએ ટાટા કન્સલ્ટન્સી સર્વિસીસ એન્ડ કેપિટલ જી ગ્રુપના નામે બોગસ વેબસાઈટ બનાવી મારી સાથે જ છેતરપિંડી કરી હોવાનું જણાઈ આવતા આખરે સાયબર સેલને જાણ કરી હતી જેથી સાયબર સેલે ગુનો નોંધી તપાસ હાથ ધરી છે.
