– રજૂઆત છતાં પાલિકા તંત્રના ઠાગાઠૈયા
– પ્લાસ્ટિકના કોથળાં ભરીને વેસ્ટ ઠલવાતા લોકોના આરોગ્ય સામે જોખમ : દુકાનદાર સામે કાર્યવાહીની માંગ
ઠાસરા : ઠાસરામાં નોનવેજ વેસ્ટ હાઈસ્કૂલ પાસે ઠલવાતા લોકોમાં આક્રોશ ફેલાયો છે. વિદ્યાર્થીઓમાં રોગચાળો ફેલાય તે પહેલા આ પ્રવૃત્તિ બંધ કરાવવા માંગણી ઉઠી છે.
ઠાસરા નગરમાં છેલ્લા ઘણા સમયથી નોનવેજના દુકાનદારો- લારીવાળા રાતે વેસ્ટ પ્લાસ્ટિકના કોથળામાં ભરી સચિદાનંદ હાઈસ્કૂલ પાસે નાખી જાય છે. આ પ્રવૃત્તિ નિત્યક્રમ બન્યો હોવાનું સ્થાનિકો જણાવી રહ્યા છે. શ્વાન સહિતના પશુઓ કોથળા તોડી નાખતા દુર્ગંધ મારતો કચરો શાળા, રહેણાંક સુધી પહોંચે છે. આ વિસ્તારમાં શાળા, છાત્રાલય સહિત સોસાયટીઓ આવેલી છે. ત્યારે વેસ્ટના કારણે ચારે તરફ દુર્ગંધ ફેલાવા સાથે વિદ્યાર્થીઓ સહિત લોકોનું આરોગ્ય જોખમાયું છે. વિસ્તારમાં રોગચાળો ફેલાવાનો ભય પણ રહેલો છે. આ અંગે હાઈસ્કૂલના પ્રિન્સિપાલે પાલિકામાં તા. ૧૩-૧૦-૨૦૨૫ના રોજ લેખિત જાણ કરાઈ હોવા છતાં પાલિકા તંત્ર યોગ્ય પગલાં લેવામાં ઠાગાઠૈયા કરી રહ્યું છે. ત્યારે સત્વરે વેસ્ટ ઠલવાયો અટકાવવા સ્થાનિકોમાં માંગણી ઉઠી છે.
