અમદાવાદ-વડોદરા એક્સપ્રેસ હાઈવે પર આવેલા
પોલીસે દારૂનો જથ્થો, કાર, મોબાઈલ સહિતનો ૩.૪૬ લાખનો મુદ્દામાલ જપ્ત કરી ગુનો નોંધ્યો
નડિયાદ: શનિવારની સાંજે અમદાવાદ-વડોદરા એક્સપ્રેસ હાઈવે ડાકોર બ્રિજ નીચેથી ગાડીમાં દેશી દારૂ ભરીને જતા બે શખ્સોને દેશી દારૂ ૬૩૦ લીટર (કિંમત રૂ. ૧,૨૬,૦૦૦)ના જથ્થા સાથે ઝડપી પાડયા હતા. આ બનાવ અંગે નડિયાદ ટાઉન પોલીસે ગુનો નોંધી વધુ કાર્યવાહી હાથ ધરી હતી.
ખેડા એલસીબીને બાતમી મળી હતી કે, અમદાવાદ-વડોદરા એક્સપ્રેસ હાઈવે પરથી આણંદ તરફથી એક ગાડી દેશી દારૂ ભરી અમદાવાદ તરફ જનાર છે. જેથી પોલીસે નડિયાદ-ડાકોર બ્રિજ નીચે વોચ ગોઠવી હતી. આ દરમિયાન એક કાર આવતા તેને ઉભી રખાવી ગાડીના ચાલકની પૂછપરછ કરતા પંકજ કસ્તુરી લાલ ગુલાટી તેમજ બાજુમાં બેઠેલ મનોજ રામ કિશન કુરિલ (બંને રહે. ખોખરા, અમદાવાદ) હોવાનું જણાવ્યું હતુ.
અમદાવાદમાં રહેતા વિમલ કુમાર કવીન્ડરે મોગરમાં રહેતા સહદેવ ઉર્ફે ટીનો કનુભાઈ તળપદાને ફોન કરવા જણાવ્યું હતું. જેથી ગાડીમાં ચાલકે ફોન કરતા મોગર ખેતરમાંથી બુટલેગરે દેશી દારૂ ભરી આપ્યો હતો.
આ ગાડીની તલાસી લેતા દેશી દારૂ ૬૩૦ લીટર (કિંમત રૂ.૧,૨૬,૦૦૦)નો અને અંગ જડતીમાંથી બે મોબાઇલ કિંમત રૂ.૨૦,૦૦૦ તેમજ રોકડ રૂ.૩૦૦ મળી આવ્યા હતા. પોલીસે રૂ.બે લાખની ગાડી મળી કુલ રૂ.૩,૪૬,૩૦૦નો મુદ્દામાલ કબજે કર્યો હતો.
આ બનાવ અંગે ખેડા એલસીબીની ફરિયાદ આધારે નડિયાદ ટાઉન પોલીસે ગુનો નોંધી વધુ કાર્યવાહી હાથ ધરી હતી.
