વોટએપ મેસેજના આધારે ચોટીલા પ્રાંતની કાર્યવાહી
કોલસાનું ખોદકામ કરનાર જમીનના કબજેદાર, કોન્ટ્રાકટર, વાહન માલિક સામે લેન્ડ ગ્રેબિંગ, તડીપારની કાર્યવાહી
સુરેન્દ્રનગર – ચોટીલા ડેપ્યુટી કલેકટર અને તેમની ટીમ દ્વારા થાન તાલુકામાંથી ગેરકાયદે કોલસાનું ખનન ઝડપી ૧૭.૩૦ લાખનો મુદ્દામાલ કબજે કર્યો છે. તંત્રની ટીમે સ્થળ પરથી ટ્રેક્ટર, સુપર પાવર નાઈટિંગ વિસ્ફોટક સહિત રૃ.૧૭.૩૦ લાખનો મુદામાલ કબજે કરી બે ભૂમાફિયા સામે લેન્ડ ગ્રેબિંગ તેમજ તડીપારની કાર્યવાહી હાથ ધરી છે.
ચોટીલા ડેપ્યુટી કલેક્ટર એચ.ટી.મકવાણા દ્વારા ગેરકાયદેસર ખનીજ ચોરી અંગે ફરિયાદ માટે જાહેર કરવામાં આવેલા વોટ્સએપ નંબર પર થાનના અભેપર ગામમાં ગેરકાયદે કોલસાનો એક કૂવો શરૃ થયા છે અને રાત્રે વિસ્ફોટક ભડાકા કરવામાં આવતા હોવાની રજૂઆત કરવામાં આવી હતી. જેને ધ્યાને લઈને ચોટીલા ડેપ્યુટી કલેક્ટર અને ટીમે થાન તાલુકાના અભેપર ગામની ખાનગી માલિકીની સર્વે નંબર ૧૧ની જમીનમાં સરપ્રાઈઝ દરોડો કર્યો હતો.
દરોડા દરમિયાન જમીનમાં ગેરકાયદે રીતે કોલસાનું ખનન કરતા ૦૩ ટ્રેક્ટર, કમ્પ્રેસર મશીન, ચરખી, ૦૪ બકેટ, ૧૯ નંગ સુપર પાવર નાઈટિંગ વિસ્ફોટક સહિત ફૂલ રૃ.૧૭.૩૦ લાખનો મુદામાલ ઝડપી પાડયો હતો અને તમામ મુદામાલ ચોટીલા મામલતદાર કચેરી ખાતે સીઝ કરાયો હતો. જ્યારે કોલસાના કૂવામાંથી મીની ટ્રેક્ટરને પણ બહાર કાઢી સ્થળ પરથી નવ મજૂરોને પણ રેસ્ક્યુ કરવામાં આવ્યા હતા.
ચોટીલા પ્રાંતની ટીમે ગેરકાયદે ખોદકામ કરનાર (૧) ગોરધનભાઈ છનાભાઈ ઝેઝરીયા રહે. અભેપર તા. થાન (જમીનના કબજેદાર ) અને (૨) જયેશભાઈ સવશીભાઈ મકવાણા રહે.દેવપરા (આ) તા.થાન (કોન્ટ્રાકટર) વાળા તેમજ વાહન માલિકો સામે લેન્ડ ગ્રેબિંગ તેમજ તડીપારની કાર્યવાહી હાથ ધરી છે. આ ઉપરાંત ગામના સરપંચ અને તલાટી સામે પણ નિયમ મુજબ કાર્યવાહી કરવામાં આવી હતી.
