પીએમ રિપોર્ટમાં યુવકના શંકાસ્પદ મોતનો ભેદ ઉકેલાયો
મૂળ ઉત્તર પ્રદેશનો અને ઝારોલ ગામે આવેલી કંપનીમાં કામ કરતો યુવક ગત જાન્યુઆરી માસમાં ગુમ થયો હતો
નડિયાદ: નડિયાદ નજીક નેશનલ હાઇવે નં. ૪૮ પર આવેલા વસો તાલુકાના દંતાલી ગામની સીમમાંથી જાન્યુઆરી શંકાસ્પદ હાલતમાં મળેલા યુવકના મોત મામલે હવે મહત્વપૂર્ણ ખુલાસો થયો છે. પોસ્ટમોર્ટમ રિપોર્ટમાં યુવકનું મૃત્યુ હિટ એન્ડ રનની ઘટનામાં થયાનું સામે આવ્યું છે.
પ્રાપ્ત માહિતી મુજબ, ઉત્તર પ્રદેશનો રહેવાસી અને નડિયાદ નજીક ઝારોલ ગામે આવેલી એક કંપનીમાં નોકરી કરતો રાજીવ છોટેલાલ પટેલ (ઉં.વ. ૩૪) ગત ૨૪ જાન્યુઆરી ૨૦૨૬ના રોજ સવારના સમયે કંપનીમાંથી નીકળ્યા બાદ પરત ફર્યો ન હતો. જેથી પરિવારજનો દ્વારા શોધખોળ હાથ ધરવામાં આવી રહી હતી. આ દરમિયાન વસો તાલુકાના દંતાલી ગામની સીમમાંથી પસાર થતા અમદાવાદ-વડોદરા નેશનલ હાઇવે નં. ૪૮ પર એક હોટલ સામે આવેલા ઝાડી-ઝાંખરામાંથી રાજીવ પટેલનો મૃતદેહ મળી આવ્યો હતો.
ઘટનાની જાણ થતાં વસો પોલીસે મૃતદેહ કબજે લઈ પોસ્ટમોર્ટમ માટે મોકલી આપ્યો હતો અને પ્રાથમિક રીતે અકસ્માતે મોતનો ગુનો નોંધ્યો હતો. પોસ્ટમોર્ટમ રિપાર્ર્ટમાં ખુલાસો થયો કે, અજાણ્યા વાહન ચાલકે ગફલતભરી રીતે પૂરઝડપે વાહન હંકારતાં રાજીવ પટેલને જોરદાર ટક્કર મારી હતી.
જેના કારણે તેમના ફેફસાં સહિત આંતરિક અંગોમાં ગંભીર ઇજા પહોંચી અને ભારે રક્તાવ થતા હૃદય બંધ પડી જવાથી ઘટનાસ્થળે જ તેમનું મોત નિપજ્યું હતું. આ ખુલાસા બાદ વસો પોલીસે અજાણ્યા વાહન ચાલક સામે ગુનો નોંધી વધુ કાર્યવાહી હાથ ધરી છે.
