વડોદરા,સમીયાલા ગામે દાગીના ધોવાના બહાને સોનુ ગાળી લેતા બે પરપ્રાંતિય યુવકોને લોકોએ ઝડપી પાડી પોલીસને હવાલે કર્યા છે. આરોપીઓ પાસેથી પોલીસે સોનાની ચેનનો ટૂકડો કબજે કર્યો છે.
શહેર નજીકના સમીયાલા ગામે રહેતા વૈશાલીબેન વિજયભાઇ ચૌહાણના ઘરે બે આરોપીઓ મુલતાની માટી, ફેસ ક્રિમ અને મેકઅપનો સામાન વેચવા માટે આવ્યા હતા. તેઓએ જણાવ્યું હતું કે, અમે કંપનીમાંથી લિક્વિડ લઇને આવીએ છે. લિકિવડ વડે તાંબા પિત્તળના વાસણો, સોના ચાંદીના દાગીના ધોઇ આપીએ છે. તેવું કહીને બે આરોપીઓએ વૈશાલીબેનની સોનાની ચેન ધોવાના બહાને લઇ સોનુ ઓગાળીને લિક્વિડ બનાવી ભાગવાની કોશિશ કરતા હતા. મહિલાએ બૂમાબૂમ કરતા ફળિયાના લોકોએ તેઓનો પીછો કરીને ઝડપી લીધા હતા અને પોલીસને સોંપી દીધા હતા. તાલુકા પોલીસે ગુનો દાખલ કરી રવિકુમાર પ્રકાશ મંડલ તથા નિતેશકુમાર અર્જુનભાઇ મંડલ ( બંને રહે. બિહાર, હાલ રહે. નડિયાદ) ની ધરપકડી કરી કાયદેસરની કાર્યવાહી હાથ ધરી છે. રવિ સામે અગાઉ ચાર અને નિતેશ સામે અગાઉ એક ગુનો દાખલ થયો છે.
