સુરેન્દ્રનગર : મુળી તાલુકાના વગડીયા ગામે દારૂ પીવાની ના પાડવા બાબતનું મનદુઃખ રાખી એક શખ્સને પગે તેમજ માથાના ભાગે છરીના ઘા ઝીંકી ઈજાઓ પહોંચાડયાની તેમજ મારી નાંખવાની ધમકી આપી હતી. જે અંગે ભોગ બનનાર શખ્સે મુળી પોલીસ મથકે એક વ્યક્તિ સામે ફરિયાદ નોંધાવતા પોલીસે તપાસ હાથ ધરી છે.
મુળીના વગડીયા ગામે રહેતા જીગનેશભાઈ અમીરભાઈ ફીસડીયા રાત્રીના સમયે ઘરે હાજર હતા. તે દરમિયાન ગામમાં જ રહેતા કિશનભાઈ વિનાભાઈ મારૂણીયા જીગનેશભાઇના ઘરના ધાબા પર આવી તેમને માથામાં તેમજ પેટના ભાગે અને પગે છરીનો ઘા ઝીંકી ઈજાઓ પહોંચાડી અપશબ્દો બોલી મારી નાંખવાની ધમકી આપી હતી. જે અંગે ભોગ બનનાર જીગનેશભાઈએ કિશનભાઈ વિનાભાઈ મારૂણીયા (રહે.વગડીયા) સામે ફરિયાદ નોંધાવતા પોલીસે તપાસ હાથ ધરી છે. પ્રાથમિક તપાસમાં કિશનભાઈ દારૂ પીવાની ટેવ હોવાથી જીગનેશભાઈ તેને દારૂ પીવાની ના પાડતા હતા જે કિશનભાઈને ગમતું નહિં હોવાથી તે બાબતનું મનદુઃખ રાખી ફરિયાદીને છરીના ઘા ઝીંક્યા હોવાનું બહાર આવ્યું હતું.
