વડોદરા, તા.8 દુમાડ ગામ પાસે મોડી રાત્રે બરોડા ડેરીની ગાડી ચેક કરવાના બહાને રૃા.૧.૮૭ લાખ રોકડા તેમજ બે મોબાઈલ તફડાવી જનાર નકલી પોલીસની ગેંગના ચાર સભ્યોને પોલીસે ઝડપી પાડયા હતાં.
દિવ્યેશ સુરેશભાઈ સોલંકી તેમજ કલ્પેશ ચંદ્રકાંત વણકર બંને બરોડા ડેરીમાંથી દૂધની પ્રોડક્ટો લઈને સાવલી તાલુકાના ગામોમાં વેચાણ કરીને વડોદરા પરત ફરતા હતા. મોડી રાત્રે દોઢ વાગે દુમાડ ગામે બાપાસીતારામની મઢૂલી પાસે ટેમ્પો ઉભો રાખી હાથ પગ ધોઈને અમે બંને ઉભા હતા તે વખતે નકલી પોલીસ બનીને આવેલા ત્રણ શખ્સોએ દૂધની ગાડીમાં દારૃ લાવો છો તેમ જણાવી ગાડી ચેક કરી હતી અને દૂધની પ્રોડક્ટના વેચાણની રોકડ રૃા.૧.૮૭ લાખ અને બે મોબાઇલનો તોડ કરી ત્રણેય શખ્સો સહિત ચાર જણા એક કારમાં ફરાર થઇ ગયા હતાં.
આ અંગેની ફરિયાદ મંજુસર પોલીસ સ્ટેશનમાં નોંધાતા પોલીસે તપાસ હાથ ધરી હતી. કારનો નંબર મેળવી પોલીસે ગણતરીના કલાકોમાં વિશ્વ રાજુ ઓડ (રહે.ગુજરાત હાઉસિંગ બોર્ડના મકાનમાં, અમરોલી, સુરત, મૂળ ચોરાવાળું ફળિયું, તરસાલી), ફિરોઝ સિકંદર શેખ (રહે.મુસ્લિમ મહોલ્લો, વરણામા), ઇર્શાદ ઉર્ફે બૂલ્લી અનવર શેખ (રહે.મુસ્લિમ મહોલ્લો, વરણામા) અને પવન ઉર્ફે વિપુલ રમેશભાઇ ઓડ (રહે.નરસિંહધામ કોમ્પ્લેક્સ, બાપોદ પોલીસ સ્ટેશન પાછળ)ને ઝડપી પાડયા હતાં.
પોલીસે ત્રણે પાસેથી તોડ કરેલ રૃા.૮૦ હજાર રોકડ, કાર અને પાંચ મોબાઇલ કબજે કર્યા હતાં. ચારેય શખ્સોની પોલીસે વધુ પૂછપરછ હાથ ધરી છે. અગાઉ નકલી પોલીસ બનીને કેટલી વ્યક્તિઓ પાસેથી પૈસા પડાવ્યા તે અંગે વધુ વિગતો બહાર આવે તેવી શક્યતા છે.
