Jamnagar Crime : જામનગરના મોરકંડા રોડ પર રબ્બાની પાર્ક સોસાયટીમાં રહેતા બે પાડોશીઓ વચ્ચે ઘરમાં કરેલા ધૂપના ધુમાડાના પ્રશ્ને બંને પરિવારો વચ્ચે તકારાત થયા બાદ ધીંગાણું ખેલાયું હતું, અને સામસામા હુમલા કરાયા હતા, જેમાં બંને પક્ષની આઠ વ્યક્તિઓ ઘાયલ થઈ છે. જે બનાવ મામલે બંને પક્ષની સામ સામે પોલીસ ફરિયાદ નોંધાવાઇ છે.
આ ફરિયાદ ની વિગત એવી છે કે જામનગરમાં મોરકંડા રોડ પર રબ્બાની પાર્ક શેરી નંબર-1માં રહેતા કાસીમભાઈ ઇસાભાઈ હિંગોરા નામના 23 વર્ષના યુવાને પોતાના ઉપર તેમજ પોતાના માતા, ભાઈ અને બહેન વગેરે ઉપર છરી ધોકા પાઇપ લાકડી જેવા હથિયારો વડે હુમલો કરી ઇજા પહોંચાડવા અંગે પાડોશમાં રહેતા માઈનોર બેન આસિફભાઇ ચૌહાણ, આસિફભાઇ ચૌહાણ, ઝાકીર મોહમ્મદ ગોરી, રેહાન ઝાકીરભાઇ ગોરી, આયાન રફાઈ, સોહિલ, નજમાબેન ઝાકીર ભાઈ ગોરી, ફિઝાબેન જાકીરભાઇ ગોરી અને સાનિયાબેન ઝાકીરભાઇ ગોરી સહિત નવ પાડોશીઓ સામે ફરિયાદ નોંધાવી છે.
પોલીસ ફરિયાદમાં જાહેર કરાયા અનુસાર પાડોશી ઝાકીરભાઈ ગોરીના ઘરનો ધૂપનો ધુમાડો બહાર આવતાં તે ધુમાડાના કારણે પાડોશીઓને તકલીફ થતી હતી જે અંગે સમજાવવા જતાં બંને પરિવારો વચ્ચે ઝઘડો થયો હતો, અને મારામારીનો બનાવ બન્યો હોવાથી પોલીસ ફરિયાદ કરાઇ છે.
આ ઉપરાંત સામા પક્ષે માઇનોરબેન આસિફ હુસેન ચૌહાણએ પોતાના ઉપર તેમજ પોતાના પરિવારના અન્ય ત્રણ સભ્યો પર હુમલો કરી ઇજા પહોંચાડવા અંગે પાડોશમાં રહેતા કાસીમ ઈશાભાઈ હિંગોરા, ગુલશનબેન અકબરભાઈ ચમડીયા, ખેરુબેન ઇસાભાઈ હિંગોરા, ઇસાભાઈ ઓસમાણભાઈ હિંગોરા, મોયુનુંદિન ઈસાભાઈ હીંગોરા અને મુસ્કાન ઈશાભાઈ હિંગોરા સહિત છ સામે વળતી ફરિયાદ નોંધાવી છે. તમામ ઇજાગ્રસ્તોને જામનગરની સરકારી જી.જી. હોસ્પિટલમાં પ્રાથમિક સારવાર અપાઇ છે. સમગ્ર મામલે સીટી એ. ડિવિઝન પોલીસ વધુ તપાસ ચલાવે છે.
