‘કાલે શાળાએ આવશો તો બે’યના ટાંટિયા ભાંગી નાખીશ’ – શાળા બંધ કરી દેવાનું કહી ‘જો આવશો તો મારી નાખીશ’ તેવી ધમકી : ‘અમારે શાળાનો કબજો લઇ મસ્જિદ-મદરેસા બનાવવા છે’ તેમ ફોનમાં કહેવાતાં પ્રા.શિક્ષક સંઘે ડે. કલેક્ટરને આવેદન આપ્યું
ધોરાજી, : ધોરાજી તાલુકાના વેલારિયા ગામે સરકારી પ્રાથમિક શાળામાં ફરજ બજાવતા આચાર્યના ફોનમાં બે વિધર્મી શખ્સે ‘તમે શાળા બંધ કરી દેજો, જો તમે શાળાએ આવશો તો આચાર્ય અને શિક્ષકોના ટાંટિયા ભાંગી નાખશું’ એવી ધમકી આપતા ડે.કલેક્ટરને આવેદન આપવા ઉપરાંત ઉપલેટા પોલીસ મથકમાં ફરિયાદ નોંધાવવામાં આવી છે.
વેલારિયાની પ્રાથમિક શાળાના આચાર્ય સતીષભાઇ કાનજીભાઇ સિંહારના ફોનમાં અસલમ નામના શખ્સે બેફામ ગાળો ભાંડી કહ્યું હતું કે તમારી શાળામાંથી વારંવાર જીવજંતુ આવે છે અને ઝાડમાંથી કચરો આવે છે એમ કહી ‘જો તું અને શાળાના શિક્ષક કલ્પેશભાઇ પરડવા કાલથી વેલારિયા શાળાએ આવશો તો તમારા બન્નેના ટાંટિયા ભાંગી નાખીશ’ એવી ધમકી આપી હતી. એ પછી ગાળો ભાંડતા ફોન કાપી નાખતા ત્રણ-ચાર વાર ફરી ફોન આવ્યા હતા.
અસલમ ઉપરાંત વલીમામદ નામની વ્યકિતએ ફોનમાં ધમકી આપી હતી કે ‘તું સ્કૂલ બંધ કરી દે જે, આ સ્કૂલમાં મારે કબજો કરી લેવાનો છે. આ જગ્યાએ મારે મસ્જિદ અને મદરેસા બનાવવાના છે’ એવી ધમકી આપવા ઉપરાંત શાળાએ ભણવા આવતા બાળકોને પણ મારીશ એવી ધમકી આપી હતી. આ ઘટના બાદ ધોરાજી તાલુકા પ્રાથમિક શિક્ષક સંઘે ડે. કલેક્ટરને અવગત કરી આવેદનપત્ર આપ્યું હતું તેમજ આચાર્ય સતીષભાઇ સિંહારે ઉપલેટા પોલીસ મથકમાં ફરિયાદ આપી છે તેમજ બન્ને સામે પગલા લેવા રજૂઆત કરી છે.
