– મોડી રાત્રે સર્જાયેલી દુર્ઘટનામાં ઘરવખરી બળીને ખાખ
– ધોળકા ફાયર બ્રિગેડે પાણીનો મારો ચલાવી આગ પર કાબુ મેળવ્યો : પરિવારની સમયસૂચકતાથી મોટી જાનહાનિ ટળી
બગોદરા : ધોળકાના કોઠ ગામે ગત મોડી રાત્રે ગેસ સિલિન્ડર લીકેજના કારણે એક રહેણાંક મકાનમાં વિકરાળ આગ ફાટી નીકળી હતી. સદનસીબે પરિવાર સુરક્ષિત બહાર નીકળી જતાં મોટી હોનારત ટળી હતી, પરંતુ આથક નુકસાન થયું છે.
ધોળકા તાલુકાના કોઠ ગામે ગત રાત્રે એક રહેણાંક મકાનમાં ગેસ સિલિન્ડર લીકેજ થવાના કારણે અચાનક આગ લાગતા અફડાતફડી મચી ગઈ હતી. ગેસના કારણે આગે જોતજોતામાં રૌદ્ર સ્વરૂપ ધારણ કરી લેતા આખું મકાન આગની લપેટમાં આવી ગયું હતું.
ઘટના સમયે ઘરમાં હાજર પરિવારના સભ્યોએ સમયસૂચકતા વાપરી તુરંત બહાર દોડી આવતા તમામનો બચાવ થયો હતો. ઘટનાની જાણ થતા જ ધોળકા ફાયર બ્રિગેડનો કાફલો ઘટનાસ્થળે પહોંચ્યો હતો અને પાણીનો મારો ચલાવી આગને વધુ પ્રસરતી અટકાવી હતી. જોકે, આગ એટલી ભીષણ હતી કે ઘરમાં રાખેલ અનાજ, કપડાં અને કિંમતી સામાન સહિતની તમામ ઘરવખરી બળીને રાખ થઈ ગઈ હતી. સ્થાનિકોના જણાવ્યા મુજબ, આગને કારણે પડોશમાં પણ ફફડાટ વ્યાપ્યો હતો. હાલ આગ પર સંપૂર્ણ કાબુ મેળવી લેવાયો છે, પરંતુ ગરીબ પરિવારને મોટું આથક નુકસાન વેઠવાનો વારો આવ્યો છે.
