Jamnagar Theft Case : ધ્રોળ તાલુકાના વાંકીયા ગામમાં રહેતા એક ખેડૂતના મકાનના ફળિયામાંથી કોઈ તસ્કરો 16 ગુણી જીરુંની ચોરી કરી ગયાના બનાવ બાદ વાંકીયા ગામમાં જ વધુ એક ગોડાઉનને તસ્કરોએ નિશાન બનાવી લઇ અંદરથી રૂપિયા અડધા લાખની કિંમતનું 16 મણ જીરું ચોરી કરી ગયાની ફરિયાદ ધ્રોળ પોલીસ મથકમાં નોંધાવાઈ હતી. જે બંને ચોરીનો ભેદ ઉકેલાઈ ગયો છે, અને ધ્રોળ પોલીસે રાજકોટ અને ગોંડલના ચાર તસ્કરોની અટકાયત કરી લઈ બે કાર, તથા રોકડ રકમ સહિત 11.26 લાખની માલમતા કબજે કરી છે.
ધ્રોલ તાલુકાના વાંકીયા ગામમાં એક ખેડૂતના મકાનના ફળિયામાંથી તાજેતરમાં રૂપિયા 1,68,000ની કિંમતની 16 ગુણી જીરુંની ચોરી થઈ હતી. ત્યારબાદ વાંકિયા ગામમાં જ વધુ એક ગોદામમાંથી 5 ગુણી જીરુંની ચોરી થયાની ફરિયાદ થઈ હતી.
ઉપરોક્ત બંને ચોરી અંગે ધ્રોલ પોલીસે જુદા જુદા સીસીટીવી કેમેરાઓ તેમજ હ્યુમન સોર્સના આધારે તપાસ હાથ ધરી ચોરીનો ભેદ ઉકેલી નાખ્યો છે, અને અગાઉ ચોરીમાં પકડાઈ ચૂકેલા રીઢા તસ્કર રાજકોટમાં ભગવતી પરામાં રહેતા વિજય ઉર્ફે બેડિયો મુકેશભાઈ સોલંકી તેમજ રાજકોટમાં ગુલાબ નગર શેરી નંબર 21 માં રહેતા રાકેશ ઉર્ફે રાહુલ મુકેશભાઈ સોલંકી ઉપરાંત ગોંડલમાં રહેલા સુનીલ ભીખુભાઈ પરમાર અને રાજકોટના રૂખડીયાપરામાં રહેતા સંજય ઉર્ફે મુકેશ ઝીણાભાઈ સોલંકીની અટકાયત કરી લીધી હતી.
ઉપરોક્ત ચારેય તસ્કરોએ ધ્રોળના વાકિયા ગામમાં ખેડૂતના તૈયાર કરીને રખાયેલા જીરુંના જથ્થાને અલગ-અલગ બે કારમાં ચોરી કરી લઈ ગયા હોવાનું અને તેનું બારોબાર વેચાણ કરી નાખ્યાનું ધ્યાનમાં આવ્યું હતું. પોલીસે ચારે આરોપીઓ પાસેથી જીજે 11 સી.8315 નંબરની રૂપિયા પાંચ લાખની કિંમતની સ્વીફ્ટ કાર, ઉપરાંત જી.જે.3 એન.કે.3239 નંબરની રૂપિયા પાંચ લાખની કિંમતની બલેનો કાર, ત્રણ નંગ મોબાઈલ પણ ઉપરાંત જીરુંના બંને ચોરીના વેચાણ થકી મેળવેલી રૂપિયા 1,20,000 ની રોકડ રકમ સહિત કુલ 11.26 લાખની માલમતા કબજે કરી લીધી છે. ઉપરોક્ત બન્ને ચોરીમાં પાંચમાં આરોપી રાજકોટમાં રહેતા રોનક રાજેશભાઈ ભટ્ટ પણ સંડોવાયેલો છે, અને હાલ પોતે ભાગી છૂટ્યો છે, જેથી પોલીસે તેને ફરાર જાહેર કરી શોધખોળ હાથ ધરી છે.
પોલીસે પકડેલા ચાર આરોપીઓ પૈકી બે આરોપી સામે અડધો ડઝનથી વધુ ગુના નોંધાયા છે
જામનગર જિલ્લાના ધ્રોલ પોલીસે વાંકીયા ગામમાંથી જીરુંના બે ખેડૂતના મકાન તેમજ ગોદામમાંથી જીરુંની ચોરી કરી જવા અંગે ચાર આરોપીઓને પકડ્યા હતા, જે પૈકી વિજય મુકેશભાઈ સોલંકી કે જેની સામે ગોંડલ, જેતપુર અને રાજકોટમાં અલગ અલગ 6-ગુનાઓ નોંધાઈ ચૂક્યા છે, અને અગાઉ જીરું સહિતના માલ સામાનની ચોરીમાં તેની અટકાયત થઈ ચૂકી છે.
તે જ રીતે બીજા આરોપી રાકેશ ઉર્ફે રાહુલ મુકેશભાઈ સોલંકી કે જેની સામે પણ ગોંડલ જેતપુર જુનાગઢ રાજકોટ અને જામનગરમાં અલગ અલગ સાત જેટલા ચોરીના ગુના દાખલ થઈ ચૂક્યા છે, અને તેમાં તેની સંડોવણી સામે આવી છે. હાલ પોલીસ દ્વારા ચારેય આરોપીઓની વધુ પૂછપરછ ચલાવાઇ રહી છે.
