– સેન્સેક્સ એક વર્ષમાં માત્ર 8.34 ટકા વધ્યો
– દક્ષિણ કોરિયામાં એક્સપોર્ટના મજબૂત આંકડા વચ્ચે માર્કેટ 60 ટકા વધ્યું , મેક્સિકોમાં 62 ટકા વધારો
અમદાવાદ : ગત અઠવાડિયે સેન્સેક્સ અને નિફ્ટી લાઈફટાઈમ હાઈ પર પહોચ્યા હતા. પરંતુ, આંકડાઓ અને રિટર્નમાં ભારે વિરોધભાસ જોવા મળી રહ્યો છે. લાઈફટાઈમ હાઈનો આંક જોઈને ઘણા કહી રહ્યાં હતાં કે, ભારત વિશ્વના સૌથી સારા ઈક્વિટી બજારોમાંનું એક છે. પરંતુ, આંકડાનો ઊંડાણપૂર્વક અભ્યાસ કર્યા બાદ સામે આવે છે કે, ભારત છેલ્લા એક વર્ષમાં સૌથી ખરાબ ઈક્વિટી બજારોમાંનું એક છે. મજબૂત મેક્રોઈકોનોમિક સંકેતો વચ્ચે પણ એક વર્ષમાં સેન્સેક્સમાં સાધારણ ૮.૩૪ ટકા જેટલો જ વધારો થયો છે. આ સમયગાળા દરમિયાન જ અનેક વૈશ્વિક બેન્ચમાર્ક્સમાં વધારો જોવા મળ્યો છે. જે ઈન્ટરનેશનલ કેપિટલ માર્કેટમાં ભારતની ઘટતી અપીલને દર્શાવે છે.
જાપાનનો નિક્કી-225 31.53 ટકા વધ્યો, હોંગ કોંગનો હેંગ સેંગ 33.13 ટકા વધ્યો
ગ્લોબલ માર્કેટમાં બુલ રનની અસર જોવા મળી રહી છે. દક્ષિણ કોરિયામાં એક્સપોર્ટના મજબૂત આંકડા અને ટેક સેક્ટરમાં સૂધારા વચ્ચે સૂચકાંક કોસ્પી ૬૦ ટકા વધ્યો છે. મેક્સિકોનો આઈપીસી ઈન્ડેક્સ ૬૨.૨૯ ટકા વધ્યો છે. અન્ય એશિયન બજારોએ પણ ભારતને પાછળ છોડયું છે.
હોંગકોંગનો હેંગ સેંગ ઈન્ડેક્સ ૩૩.૧૩ ટકા વધ્યો છે. જાપાનનો નિક્કી-૨૨૫ ૩૧.૫૩ ટકા વધ્યો છે. જ્યારે, સ્પેનનો આઈબીઈએક્સ-૩૫ ૪૦.૬૩ ટકા વધ્યો છે. યુરોપિયન બજારો પણ ભારત કરતા સારા ચમક્યા છે. લંડનનો એફટીએસઈ-૧૦૦ ૧૭.૨૯ ટકા, ઈટાલીનો એફટીએસઈ એમઆઈબી ૨૯.૫૮ ટકા, બ્રાઝિલનો બોવેસ્પા ઈન્ડેક્સ ૨૬.૫૮ ટકા વધ્યો છે. ચીને અનેક આર્થિક અવરોધો વચ્ચે પણ ૧૬.૯૦ ટકા વળતર આપ્યું છે. ભારત સાથે ઓસ્ટ્રેલિયા અને રશિયાના માર્કેટનું પ્રદર્શન નબળું રહ્યું છે. ઓસ્ટ્રેલિયામાં ૨.૧૧ ટકા અને રશિયામાં યુક્રેન યુદ્ધ વચ્ચે ૩.૮૨ ટકાનો જ વધારો જોવા મળ્યો હતો.
FPIની પીછેહઠ : ભારતને 1.48 લાખ કરોડનો ફટકો
એનએસડીએલના ડેટા અનુસાર, એફપીઆઈએ તેમના ભારતના એક્સપોઝરને ઘટાડયું છે. તેમણે જાન્યુઆરી, ૨૦૨૫થી ભારતીય ઈક્વિટીમાંથી રૂ. ૧.૪૮ લાખ કરોડ રૂપિયા પાછા ખેંચી લીધા છે. ભારતના મજબૂત મેક્રો ફંડામેન્ટલ્સ, સ્થિર ફુગાવાના આંકડા અને સ્થિર વ્યાજ દર વચ્ચે પણ નોંધપાત્ર આઉટફ્લો ચિંતાનો વિષય બન્યો છે. જાણકારોના મતે, ભારતને સ્થાનિક સંસ્થાકીય અને રિટેલ રોકાણકારોનો સાથ મળ્યો છે. જેના કારણે માર્કેટ પોઝીટીવ જોવા મળી રહ્યું છે. એપ્રિલ ૨૦૨૫માં ૭૧,૪૨૫ના તળિયા બાદ ૨૭ નવેમ્બર, ૨૦૨૫ના રોજ ૮૬,૦૫૫ની ઊંચાઈ બાદ સેન્સેક્સ ૪ ડિસેમ્બરે ૮૫,૨૬૫ પર બંધ થયું હતું.
