પાદરા તાલુકાના કોટણાગામે આજે ગંભીર અકસ્માત સર્જાયો હતો. કરજણના વિરજઈથી કોટણા ગામને જોડતા કોઝવે પરથી પસાર થતી બાઈક અચાનક ઢાઢર–વિશ્વામિત્રી નદીમાં ખાબકતા બે બાળકો પાણીના વહેણમાં તણાઈ જતા ફાયર બ્રિગેડની ટીમોએ શોધખોળ હાથ ધરી છે. આ ઘટનામાં માતા-પિતાનો બચાવ થયો હતો.
મળતી માહિતી મુજબ, કોટણા ગામના રહેવાસી હિતેશભાઈ જયંતિભાઈ પઢીયાર પિયર માંથી પત્ની વૈશાલીબેનને વાઘોડિયા તાલુકાના અલ્વા ગામથી પોતાના બે સંતાન દેવેન્દ્ર (ઉંમર 5 વર્ષ) અને સોહમ (ઉંમર 3 વર્ષ) સાથે બાઈક પર કોટણા પરત લાવી રહ્યા હતા. વરસાદના કારણે કોઝવે પર પાણી ભરાયા હોઈ બાઈક સ્લીપ થઈ જતા પરિવાર નદીના પ્રવાહમાં તણાઈ ગયો હતો. ઘટનાની જાણ થતાં જ કોટના ગામના માજી સરપંચ રાજુભાઈ પઢીયાર સહિત ગ્રામજનો મોટી સંખ્યામાં સ્થળ પર પહોંચી ગયા હતા અને બચાવ કામગીરી શરૂ કરી હતી. વડુ પોલીસ અને કરજણ , વડોદરા ફાયર બ્રિગેડની ટીમો પણ સ્થળ પર દોડી જઈ ગુમ બાળકોની શોધખોળ શરૂ કરી હતી. ગ્રામજનોએ તાત્કાલિક હિતેશભાઈ અને પત્ની વૈશાલીબેનને બહાર કાઢી તેમનો બચાવ કર્યો હતો. જો કે, તેમના બે બાળકો પાણીના વહેણમાં તણાઈ જતા ગુમ થયા હતા. હિતેશભાઈ ખાનગી કંપનીમાં નોકરી કરે છે. સ્થાનિકોએ પ્રશાસનને જણાવ્યું હતું કે, ચોમાસામાં કોઝવે પર ચેતવણી બોર્ડ અને સુરક્ષા વ્યવસ્થા ઉભી કરવી જોઈએ. ઘટના સ્થળે મગરનો ઉપદ્રવ હોવાથી બચાવ કાર્યમાં વિક્ષેપ થઈ રહ્યો છે.
