– હવામાન વિભાગનું એપ્રિલથી જૂન સુધીનું પૂર્વાનુમાન
– એપ્રિલથી જૂનમાં દેશનાં મોટા ભાગના વિસ્તારોમાં લઘુતમ તાપમાન સામાન્યથી વધારે રહેવાની સંભાવના
– પશ્ચિમી વિક્ષેપને કારણે ઉત્તર ભારતનાં મેદાની વિસ્તારોમાં વરસાદ અને ઉંચાઇવાળા વિસ્તારોમાં બરફ વર્ષા
નવી દિલ્હી : એપ્રિલથી જૂનની વચ્ચે પૂર્વ, મધ્ય અને ઉત્તર પશ્ચિમ ભારતનાં કેટલાક વિસ્તારોની સાથે સાથે દક્ષિણ પૂર્વ દ્વીપકલ્પમાં સામાન્યથી વધારે દિવસ હિટવેવ રહેવાની સંભાવના છે તેમ ભારતીય હવામાન વિભાગ (આઇએમડી)એ મંગળવારે પોતાના માસિક પુર્વાનુમાનમાં જણાવ્યું છે.
આ મહિનાઓ દરમિયાન દેશનાં અનેક વિસ્તારોમાં મહત્તમ તાપમાન સામાન્ય અથવા સામાન્યથી ઓછું રહેવાની શક્યતા છે. જો કે તેમાં પૂર્વ, ઉત્તર-પૂર્વ ભારતનાં મોટા ભાગનાં વિસ્તારો, મધ્ય ભારતનાં પૂર્વીય ભાગો તથા આસપાસનાં દ્વિપકલ્પ ક્ષેત્રોનો સમાવેશ થતો નથી કારણકે ત્યાં મહત્તમ તાપમાન સામાન્યથી વધારે રહેવાની શક્યતા છે.
આઇએમડીનાં જણાવ્યા અનુસાર ગરમીની સિઝન (એપ્રિલ-મે-જૂન) દરમિયાન દેશનાં મોટા ભાગના વિસ્તારોમાં લઘુતમ તાપમાન સામાન્યથી વધારે રહેવાની સંભાવના છે. જો કે તેમાં મહારાષ્ટ્ર અને તેલંગણાનાં કેટલાક વિસ્તારોનો સમાવેશ થતો નથી કારણકે ત્યાં લઘુતમ તાપમાન સામાન્ય કે સામાન્યથી ઓછું રહેવાની સંભાવના છે.
આઇએમડીએ જણાવ્યું હતું કે ઉત્તર પૂર્વ ભારતને છોડીને દેશનાં મોટા ભાગનાં વિસ્તારોમાં વરસાદ સામાન્ય કે સામાન્યથી વધારે રહેવાની સંભાવના છે. ઉત્તર પૂર્વ ભારતનાં અનેક વિસ્તારોમાં વરસાદ સામાન્યથી ઓછું રહેવાની શક્યતા છે.
બીજી તરફ આઇએમડીએ જણાવ્યું છે કે એક નવા પશ્ચિમી વિક્ષેપને કારણે મંગળવારે ઉત્તર ભારતનાં કેટલાક વિસ્તારોમાં વરસાદ પડયો હતો જ્યારે હિમાચલ પ્રદેશનાં ઉંચાઇવાળા વિસ્તારોમાં હળવી બરફ વર્ષા થઇ હતી.
જમ્મુ-કાશ્મીરનાં બારામુલ્લા જિલ્લામાં ભારે વરસાદ પડવાને કારણે એક નાળામાં પાણીનું સ્તર અચાનક વધી ગયું હતું. જેના પગલે સ્થાનિક શાળાની હોસ્ટેલમાં પાણી ભરાઇ ગયું હતું. સેનાએ ૩૦ વિદ્યાર્થીઓ અને ચાર શિક્ષકો સહિત ૩૪ લોકોને બચાવ્યા હતાં.
