– 1 લી જાન્યુઆરીએ લાયક ઉમેદવારોના બદલી ઓર્ડર અપાશે
– આજથી ખાલી જગ્યાની માહિતી ઓનલાઇન પોર્ટલમાં એન્ટર કરવાની કામગીરી શરૂ : 29 મીએ ચિત્ર સ્પષ્ટ થશે
ભાવનગર : જિલ્લાની સરકારી પ્રાથમિક શાળાઓમાં ફરજ બજાવતા વિદ્યા સહાયક, પ્રા.શિક્ષકોની જિલ્લા આંતરિક બદલી (ઓનલાઇન) કેમ્પનું આયોજન જાહેર કરાયું છે. તા.૧૩ થી આરંભ થતી આ પ્રક્રિયા તા.૧ જાન્યુઆરી સુધી ચાલશે. જ્યારે બાકી રહેલી જગ્યા માટે જનરલ તબક્કો રહેશે.
શિક્ષણ વિભાગના ઠરાવની જોગવાઇ મુજબ ખાલી જગ્યાોની ચકાસણી કર્યાં બાદ જે-તે વિભાગ, વિષયવાર ચોખ્ખી ખાલી જગ્યાઓ અપલોડ કરવાની સુચના અપાઇ છે સાથે પ્રથમ તબક્કાના જિલ્લા આંતરિક બદલી કેમ્પ (ઓનલાઇન) નો કાર્યક્રમ જાહેર કરાયો છે. જેમાં તા.૧૩ થી ૧૫ ખાલી જગ્યાની માહિતી અપલોડ થશે, પછી વેરીફીકેશન જ્યારે તા.૧૭ થી ૧૯ ડિસે. શિક્ષકો બદલી માટેના ફોર્મ ભરી શકશે જેને પ્રથમ તાલુકા કક્ષાએ અને બાદમાં ૨૯ ડિસે. સુધીમાં જિલ્લા કક્ષાએ ચકાસણી કાર્ય હાથ ધરાશે અને માન્ય-અમાન્ય ઠરાવ્યા બાદ રાજ્યકક્ષાએ વેરિફીકેશન કરવામાં આવશે. જે સંપૂર્ણ પ્રક્રિયા બાદ તા.૧ જાન્યુઆરીએ ઓર્ડર ઇસ્યુ કરાશે. જ્યારે આ પ્રથમ તબક્કા બાદ પણ ખાલી રહેલી જગ્યાઓ માટે ૨ જાન્યુ.થી જનરલ કેમ્પનું આયોજન શરૂ થશે. જેમાં બાકી રહેલા શિક્ષકો બદલી માટે તા.૫ અને ૬ જાન્યુ. દરમિયાન ઓનલાઇન ફોર્મ ભરી શકશે જેના ત્રણ લેયર વેરીફીકેશનની કામગીરી પૂર્ણ થયે તા.૧૬ જાન્યુઆરીના રોજ ઓર્ડર ઇસ્યુ કરવામાં આવશએ. આ બદલી કેમ્પમાં જેમ ઉમેદવારની અરજીનું તાલુકા, જિલ્લા અને રાજ્યકક્ષાએ વેરીફીકેશન કરવાની ચીવટ રખાઇ છે તેમ પોર્ટલ પર ખાલી જગ્યાઓ દર્શાવવામાં પણ ખાસ કાળજી લેવા અને સંલગ્ન નિયમોનું પાલન કરવા શિક્ષણ વિભાગે તાકીદ કરી છે.
વધ પરત બદલી કેમ્પમાં 5 શિક્ષકોને લાભ મળ્યો
પ્રા.શિ. નિયામક દ્વારા જાહેર કરેલ વધ પરત બદલી કેમ્પ આજે યોજાયો હતો જેમાં જે-તે શાળામાં અગાઉ શિક્ષકોની વધ થતા અન્ય બદલી થયેલ જે વધ ઘટના પરત મુળ શાળામાં આવવા તક અપાઇ હતી જેમાં ભાવનગરના ૧, મઢડાથી કનાડ-૧, પાલિતાણાથી સિહોર ૧, તળાજાના માંડવાથી ત્રાપજ ૧ અને પાલિતાણાથી ઘોઘા ૧ એમ પાંચ પ્રા.શિક્ષકોને વધ પરત બદલીનો લાભ મળ્યો હતો.
