વડોદરા,વહેલી સવારે બંગલાના કામ પર જવા નીકળેલા વૃદ્ધાને ટક્કર મારીને કારચાલક ભાગી ગયો હતો. ગંભીર ઇજાગ્રસ્ત વૃદ્ધાનું મોત થયું છે. પોલીસે સીસીટીવી ફૂટેજના આધારે તપાસ હાથ ધરી છે.
આજવારોડ ખટ્ટી ઇમલી હોટલ પાસે નવી વસાહતમાં રહેતા શારદાબેન મોહનભાઇ ભાલીયા (ઉં.વ.૬૫) આજે સવારે છ વાગ્યે ઘરેથી ચાલતા નીકળી ભાગ્ય લક્ષ્મી સોસાયટીમાં બંગલાના કામકાજ માટે જતા હતા. તે દરમિયાન એક કારચાલકે ટક્કર મારતા તેઓને માથા તથા પગમાં ગંભીર ઇજા થતા સારવાર માટે હોસ્પિટલમાં લઇ જવામાં આવ્યા હતા.પરંતુ,તેઓનો જીવ બચી શક્યો નહતો. બાપોદ પોલીસે આ અંગે ગુનો દાખલ કર્યો છે.કારના નંબરના આધારે પી.એસ.આઇ. જે.એલ.જોદ્ધાએ ભાગી ગયેલા કાર ચાલકની શોધખોળ હાથ ધરી છે. સીસીટીવી ચેક કરતા જણાઇ આવે છે કે, અકસ્માત પછી કાર ચાલક થોડીવાર ઊભો રહે છે. કારમાંથી અન્ય લોકો પણ નીચે ઉતરીને જુવે છે.જેમાં વિદેશી યુવતીઓ પણ હતી. પરંતુ, કારચાલક અને તેની સાથેના લોકો ઇજાગ્રસ્તને સારવાર માટે હોસ્પિટલમાં લઇ જવાના બદલે ભાગી જાય છે. સીસીટીવીમાં કારચાલકે ચાલતી જતી વૃદ્ધાને જોઇ જ નહીં હોવાનું દેખાય છે.
રિવર્સ લેતી કારના ચાલકે ટક્કર મારતા
પરીક્ષા આપીને પરત ઘરે આવતા વિદ્યાર્થીને ગંભીર ઇજા
બેભાન હાલતમાં વિદ્યાર્થી સારવાર લઇ રહ્યો છે ઃ કારચાલકની શોધખોળ
વડોદરા
ન્યુ સમા રોડ પર રિવર્સ લેતી કારના ચાલકે બાઇક પર જતા બે વિદ્યાર્થીઓને ટક્કર મારતા ગંભીર ઇજા થઇ છે. ફતેગંજ પોલીસે ગુનો દાખલ કરી બાઇક ચાલકની શોધખોળ શરૃ કરી છે.
સેવાસી પ્રિયા ટોકીઝની પાછળ અવધ હાઇટ્સમાં રહેતો હનોખ વિપુલભાઇ પરમાર (ઉં.વ.૨૧) ખાનગી યુનિવર્સિટીમાં અભ્યાસ કરે છે. ગઇકાલે સવારે તેના મિત્ર પ્રતિક પરમાર સાથે બાઇક લઇને ઘરેથી નીકળી કોલેજમાં પરીક્ષા આપવા માટે ગયા હતા. બપોરે પોણા ત્રણ વાગ્યે તેઓ કોલેજથી ઘરે પરત આવતા હતા. હનોખ બાઇક ચલાવતો હતો. તે દરમિયાન શુક્લાનગર નજીક રિવર્સ લેતા કારચાલકે હનોખની બાઇકને ટક્કર મારતા હનોખ રોડ પર પટકાયો હતો. તેને ગંભીર ઇજા થતા સારવાર માટે ખાનગી હોસ્પિટલમાં દાખલ કરવામાં આવ્યો છે. ઇજાગ્રસ્ત વિદ્યાર્થી હજી બેભાન હાલતમાં છે. ફતેગંજ પોલીસે ગુનો દાખલ કરી કાયદેસરની કાર્યવાહી હાથ ધરી છે.
