અલીન્દ્રા પાસે ડિવાઈડર સાથે બાઈક અથડાયું
નડિયાદથી ઓપીડી પતાવી પરત જતા એક્સપ્રેસ-વે પર કાર પાછળ ગાડીની ટક્કરઃ ડૉક્ટર, ડ્રાઈવરને ઈજા
નડિયાદ: નડિયાદ તાલુકામાં અકસ્માતના બે બનાવોમાં એક વ્યક્તિનું મોત થવા સાથે ત્રણ વ્યક્તિ ઈજાગ્રસ્ત બની છે. ડાકોર- નડિયાદ રોડ ઉપર અલીન્દ્રા પાસે ડિવાઈડર સાથે બાઈક અથડાતા વતન ખીજલપુરા આવતા યુવકનું મોત થયું છે. જ્યારે અમદાવાદ- નડોદરા એક્સપ્રેસ હાઈવે ઉપર ટોલનાકા પાસે કાર પાછળ ગાડી અથડાતા ડૉક્ટર અને ડ્રાઈવરને ઈજા થઈ છે.
રોજકોટ નોકરી કરતા મિતુલભાઈ બુધાભાઈ વાઘેલા (ઉં.વ.૨૭) દિવાળીના તહેવારો હોવાથી ગઈકાલે બાળકોના કપડાં લઈ પરિચિતની બાઈક ઉપર પોતાના વતન ઠાસરાના ખીજલપુરા જતા હતા. ત્યારે નડિયાદ- ડાકોર રોડ ઉપર અલીન્દ્રા પાસે બાઈક ડિવાઈડર સાથે અથડાતા અકસ્માત સર્જાયો હતો. જેમાં બાઈક પાછળ બેઠેલા મિતુલભાઈ વાઘેલાનું ઘટના સ્થળે જ મોત નિપજ્યું હતું. આ બનાવ અંગે બુધાભાઈ કાળાભાઈ વાઘેલાની ફરિયાદના આધારે ચકલાસી પોલીસે ગુનો દાખલ કર્યો છે. જ્યારે અકસ્માતના બીજા બનાવમાં અમદાવાદ મેમનગરમાં રહેતા નમન મોતીલાલ અહારી ડોક્ટર મયુર પટેલની ગાડી પર ડ્રાઇવર તરીકે નોકરી કરે છે. તેઓ ગઈકાલે તા.૧૫મીની સાંજે ડોક્ટર મયુર પટેલના દીકરા ડો.કુશ પટેલને સંતરામ આંખની હોસ્પિટલમાં નોકરી હોવાથી ગાડી લઈને નડિયાદ આવ્યા હતા. જ્યાં ઓપીડી પૂરી થયા બાદ ડોક્ટર કુશ પટેલને લઇ અમદાવાદ- વડોદરા એક્સપ્રેસ હાઈવે પરથી પરત જઈ રહ્યા હતા. દરમિયાન ટોલનાકાથી થોડા આગળ પાછળથી આવેલી ગાડી અથડાતા ગાડીના ચાલક નમનભાઈ અહારી તેમજ પાછળ બેઠેલ ડોક્ટર કુશ પટેલને ઈજા થઈ હતી. આ બનાવ અંગે નમન મોતીલાલ અહારીની ફરિયાદના આધારે નડિયાદ ટાઉન પોલીસે ગુનો દાખલ કર્યો છે.
