વડોદરા,ક્રિસ્ટલ પ્રમુખ કોમર્શિયલ હબ સ્કીમના બિલ્ડરે દુકાન બુકીંગ પેટે ૬.૧૫ લાખ લઇ કામ પૂરૃં કર્યું નહતું. જે અંગે બાપોદ પોલીસે ગુનો દાખલ કર્યો હતો. નાસતા ફરતા બિલ્ડરને ડીસીબી પોલીસે તેને ઝડપી પાડી બાપોદ પોલીસને હવાલે કર્યો છે.
આજવા રોડ સુરભી પાર્ક સોસાયટીમાં રહેતા રમીલાબેન દિનેશભાઇ મોરડીયાએ બાપોદ પોલીસ સ્ટેશનમાં ફરિયાદ નોંધાવી જણાવ્યું છે કે, વર્ષ – ૨૦૧૫ માં કેયા બિલ્ટેક એલ.એલ.પી. નામની પેઢીના ભાગીદાર મનિષ મહેન્દ્રભાઇ પટેલે ખોડિયાર નગર ચાર રસ્તા પાસે ક્રિસ્ટલ પ્રમુખ કોમર્શિયલ હબ નામથી દુકાનો તથા ઓફિસોની સ્કીમ લોન્ચ કરી હતી. જે સ્કીમમાં દુકાન બુક કરાવવા માટે સંપર્ક કર્યો હતો. અમે ૧૭ લાખમાં એક દુકાન બુક કરાવી હતી અને એડવાન્સ પેટે દોઢ લાખ જમા કરાવ્યા હતા. વર્ષ ૨૦૧૯ સુધી અમે કુલ ૬.૧૫ લાખ જમા કરાવ્યા હતા. પરંતુ, તેઓએ બાંધકામ પૂરૃં નહીં કરી દસ્તાવેજ કરી આપ્યો નહતો. અવારનવાર તેઓને વાત કરવા છતાંય તેઓએ કામ પૂરૃં કર્યું નહતું. અમારો મોબાઇલ ફોન પણ રિસિવ કરતા નહતા. આ અંગે બાપોદ પોલીસે બિલ્ડર મનિષ પટેલ તથા તેની પત્ની રૃપલબેન સામે ગુનો દાખલ કર્યો છે. ઉલ્લેખનીય છે કે, મનિષ પટેલ સામે અગાઉ છેતરપિંડીના ૧૮ ગુનાઓ નોંધાયા હતા.તેમજ ગોરવા અને બાપોદ પોલીસ સ્ટેશનમાં થોડા સમય પહેલા નોંધાયેલા ત્રણ ગુનામાં તે નાસતો ફરતો હતો.દરમિયાન ડીસીબી પોલીસને માહિતી મળી હતી કે, આરોપી અમદાવાદથી એક્સપ્રેસ હાઇવે પર વડોદરા આવવાનો છે. જેથી, પી.આઇ. આર.જી. જાડેજાની સૂચના મુજબ, પોલીસ સ્ટાફે વોચ ગોઠવીને આરોપી મનિષ પટેલ (રહે. સિલ્વર પાર્ક, કરોડિયા રોડ તથા સાઇન પ્લાઝા, નટુભાઇ સર્કલ, રેસકોર્સ) ને ઝડપી પાડયો હતો.
