– મહિલા સહિત 15 લોકોની ધરપકડ
– પોલીસ કર્મચારીઓને માર મારી રોકડ રકમ અને મોબાઈલની લૂંટ ચલાવી
ભાવનગર : વેળાવદર ભાલ પંથક જશવંતપુર ગામે જુગારની રેડ કરવા ગયેલી પોલીસ પાર્ટી પર ૨૦થી વધુ લોકોએ હુમલો કરી બીજા પહોંચાડી ફરજમાં રૂકાવટ કરી રોકડ રકમ અને મોબાઇલની લૂંટ ચલાવી હતી.
ભાવનગરમાં ફરી એક વખત પોલીસ કર્મચારીઓ પર હિચકારા હુમલાનો બનાવ બનવા પામ્યો છે. પોલીસ પર હુમલો થયો હોવાના બનાવોનું પ્રમાણ પણ ભાવનગરમાં પહોંચી રહ્યું છે અને અસામાજિક તત્વોને પોલીસનો જાણે ડર ન લાગતો હોય તેમ રેડ કરવા ગયેલી પોલીસ તિક્ષ્ણ હથિયાર વડે હુમલો કરી લૂંટ ચલાવી હતી. આ બનાવને લઈ સમગ્ર પંથકમાં ચકચાર મચી જવા પામી છે. આ સમગ્ર બનાવવાની જાણવા મળતી માહિતી મુજબ વેળાવદર ભાલ પંથકમાં આવેલા જશવંતપુર ગામમાં આવેલ સિકોતરમાના મંદિર નજીક જુગારની બાજી મંડાઈ હોવાની બાતમી વેળાવદર ભાલ પોલીસ મથકને મળી હતી. આ બાતમીના આધારે વેળાવદર ભાલ પોલીસ મથકના પોલીસ કોન્સ્ટેબલ લક્કીરાજસિંહ મહાવીરસિંહ ગોહિલ, પોલીસ કોન્સ્ટેબલ અભેસંગ ભાઈ ભાવસંગભાઈ અને પ્રતિપાલસિંહ ધુ્રવપતસિંહ ખાનગી વાહનમાં જસવંતપૂર પહોંચી અન્ય પોલીસ કર્મચારીને જાણ કરી જુગાર રમી રહેલા મહિલા સહિત ૨૦થી વધુ લોકોને પકડવાનો પ્રયાસ કરતા ઉશ્કેરાયેલા ટોળાએ પોલીસ કર્મચારીને ગાળો આપી ફરજમાં રૂકાવટ કરી લક્કીરાજસિંહને માથાના ભાગેલાકડાના ધોકા વડે માર મારી ગંભીર ઈજા કરી તથા પ્રતિપાલસિંહને જમણા હાથે હથેળીમાં છરી વડે ઇજા કરી પાણીના તળાવમાં ફેંકી દઇ ગુપ્ત ભાગે પાટા મારી ઇજા કરી કરી હતી. તેમજ અભેસંગભાઈને શરીરે મુંઢ ઇજા કરી ખિસ્સામાંથી રોકડ રૂ.૨,૨૦૦ તથા પ્રતિપાલસિંહનો મોબાઇલ ફોન તથા ફોરવ્હીલની ચાવી તથા રોકડ રકમ ૨૦૦૦ ખિસ્સામાંથી કાઢી લુંટ કરી કરી હતી. આ બનાવ સંદર્ભે ડીવાયએસપી આર.આર.સિંઘલે જણાવ્યું હતું કે, આ ઘટનામાં મહિલા સહિત ૧૫ લોકોની ધરપકડ કરવામાં આવી છે.
મહિલા સહિત 20 લોકો સામે ફરિયાદ નોંધાઈ
ભાલ પંથકમાં પોલીસ પર હુમલો કરનાર શખ્સો રાકેશ રાજુભાઈ ડાભી, નિલેશ હરજી મકવાણા, હાદક મનસુખભાઈ મકવાણા, મહેન્દ્ર કાનજીભાઈ ચુડાસમા, રમુ વાલજીભાઈ મકવાણા, હિરેન હસમુખભાઈ ચૌહાણ, રાજેશ છનાભાઇ ચૌહાણ, મનસુખ વાલજી મકવાણા, વિજય બટુકભાઈ ચુડાસમા, મહેશ હરજી મકવાણા, રાહુલ રાજેશ ગુજરીયા, ક્રિષ્નાબેન મનસુખભાઈ મકવાણા, રીંકલબેન હાર્દિકભાઈ મકવાણા, હસમુખ વિઠલભાઈ ચૌહાણ, સુનીલ રમેશભાઈ સોલંકી, અકવીન ધનજીભાઈ ઢાપા, રમુ વાલજીભાઈ મકવાણા, અમિતાબેન હીરેનભાઈ ચૌહાણ, નયના રાકેશભાઈ ડાભી તથા બીજા અજાણ્યા માણસોનો સમાવેશ થાય છે.
આઉટ સોર્સ તરીકે ફરજ બજાવી ચુકેલા ડ્રાઇવરને ગાડીમાં બેસાડયા
વેળાવદર ભાલ પોલીસ મથકના પોલીસ કોન્સ્ટેબલ લક્કીરાજસિંહ મહાવીરસિંહ ગોહિલ, પો.કોન્સ. અભેસંગભાઈ ભાવસંગભાઈ ખાનગી વાહનમાં પેટ્રોલીંગમાં રવાના થયેલ અને પોલીસ સ્ટેશનથી બહાર નીકળતાં પોલીસ સ્ટેશનમાં આઉટ સોર્સ ડ્રાઇવર તરીકે ભૂતકાળમાં ફરજ બજાવી ચુકેલ પ્રતિપાલસિંહ ધુ્રપતસિંહ મળતા તેને પણ સાથે ખાનગી વાહનમાં બેસાડી રેઈડમાં જસવંતપૂર લઈને પહોંચ્યા હતા.
