– બાસ્કેટબોલ, હેન્ડબોલ, વોલીબોલ, એથ્લેટિક્સ સહિતની કેટલીક રમતના ખેલાડીઓને ઈનામની રકમ નહીં મળતા નારાજગી
ભાવનગર : ભાવનગર સહિત રાજ્યભરમાં ચાલુ વર્ષે ખેલ મહાકુંભનો ધમધમાટ શરૂ થઈ ગયો છે પરંતુ ભાવનગરના ઘણા ખેલાડીઓને ગત વર્ષની ઈનામની રકમ મળી નથી તેથી ખેલાડીઓમાં ભારે નારાજગી જોવા મળી રહી છે.
છેલ્લા કેટલાક વર્ષથી રાજ્ય સરકાર દ્વારા ખેલાડીઓને પ્રોત્સાહન આપવા ખેલ મહાકુંભનું આયોજન કરે છે, જે સારી બાબત છે પરંતુ ગત વર્ષના ઈનામની રકમ ખેલાડીઓને હજુ સુધી ન મળે તે યોગ્ય બાબત નથી. ભાવનગર શહેર અને જિલ્લાના બાસ્કેટબોલ, હેન્ડબોલ, વોલીબોલ, એથ્લેટિક્સ સહિતના કેટલીક રમતના ૧૦૦ થી વધુ ખેલાડીઓને ગત વર્ષના ખેલ મહાકુંભની ઈનામની રકમ મળી નથી તેથી ખેલાડીઓ કચવાટ કરતા નજરે પડી રહ્યા છે. ચાલુ વર્ષે ખેલ મહાકુંભ શરૂ થઈ ગયો છતાં ગત વર્ષના ઈનામની રકમ આયોજનના અભાવે મળી ન હોવાનુ સુત્રોમાંથી જાણવા મળેલ છે.
શહેર અને જિલ્લામાં તાલુકા, ઝોન કક્ષા, જિલ્લાકક્ષા, રાજ્યકક્ષા વગેરે કક્ષાએ તબક્કાવાર ખેલ મહાકુંભ રમાડવામાં આવે છે અને ખેલાડીઓ ઉત્સાહભેર ખેલ મહાકુંભમાં ભાગ પણ લે છે ત્યારે તેઓને પુરસ્કારની રકમ સમયસર ન મળે ત્યારે ખેલાડીઓનો ઉત્સાહ ઘટી જતો હોય છે. બાસ્કેટબોલના ખેલાડીઓને છેલ્લા બે વર્ષથી પુરસ્કારની રકમ ન મળી હોવાનુ ચર્ચાય રહ્યુ છે ત્યારે આ બાબતે તત્કાલ યોગ્ય તપાસ કરી પગલા લેવા જરૂરી છે તેમ રમતપ્રેમીઓ જણાવી રહ્યા છે.
15 દિવસમાં ખેલાડીઓને ઈનામની રકમ મળી જશે : જિલ્લા રમત-ગમત અધિકારી
ભાવનગર શહેર અને જિલ્લાના જે ખેલાડીઓને ગત વર્ષના ખેલ મહાકુંભની ઈનામની રકમ મળી નથી તેઓની જાણ ગાંધીનગર કચેરીએ કરવામાં આવી છે. બેંક એકાઉન્ટ સહિતના કારણોસર ખેલાડીઓને પુરસ્કારની રકમ મળી નથી પરંતુ આ બાબતે વડી કચેરી દ્વારા આગામી ૧પ દિવસમાં ખેલાડીઓના બેંક એકાઉન્ટમાં રકમ જમા થઈ જાય તેવુ આયોજન કરવામાં આવી રહ્યુ છે તેમ માહિતી આપતા ભાવનગરના જિલ્લા રમત-ગમત અધિકારી નરેશ ગોહેલે જણાવેલ છે.
