ગાંધીનગર જિલ્લા તંત્રના જાહેરનામા છતાં
અડાલજ પોલીસ દ્વારા અલગ અલગ ત્રણ બાંધકામ સાઈટ ઉપર તપાસ કરાયા બાદ કાર્યવાહી
ગાંધીનગર : જિલ્લામાં હાલ બાંધકામ સાઈટ ઉપર કામ કરતા મજૂરોના નામ
સરનામા સાથેની વિગતોનું રજીસ્ટર નિભાવવા માટે જિલ્લા તંત્ર દ્વારા જાહેરનામું બહાર
પાડવામાં આવ્યું છે ત્યારે તેનું ઉલ્લંઘન કરનાર ત્રણ જેટલા કોન્ટ્રાક્ટર સામે
અડાલજ પોલીસ દ્વારા જાહેરનામા ભંગ બદલ કાર્યવાહી કરવામાં આવી છે.
રાજ્યનું પાટનગર હોવાના કારણે ગાંધીનગરની સુરક્ષા મહત્વની
છે ત્યારે અહીં અવારનવાર બનતી ચોરી અને અન્ય ઘટનાઓને પગલે ગાંધીનગર જિલ્લા વહીવટી
તંત્ર દ્વારા તાજેતરમાં જાહેરનામું બહાર પાડવામાં આવ્યું હતું અને ફેક્ટરી તેમજ
અન્ય વિસ્તારો અને બાંધકામ સાઈટ ઉપર પર પ્રાંતમાંથી આવતા મજૂરોની ઓળખ થઈ શકે તે
માટે તેમના નામ સરનામા સાથેનું વિગતવાર રજીસ્ટર મેન્ટેન કરવા માટે તાકીદ કરવામાં
આવી હતી. જોકે હજી પણ ઘણા કોન્ટ્રાક્ટર આ જાહેરનામનો પાલન કરતાં નથી અને જેના પગલે
પોલીસ દ્વારા અલગ અલગ વિસ્તારમાં તપાસ કરવામાં આવી રહી છે. અડાલજ પોલીસની ટીમ
ગઈકાલે પેટ્રોલિંગમાં હતી તે દરમિયાન અડાલજ ગામની સીમમાં આવેલ સ્વર્ણીમ ગ્રીન
નામની કન્સ્ટ્રક્શન સાઇટ ઉપર તપાસ કરી હતી પરંતુ અહીં મજૂરોનું કોઈ રજીસ્ટર
નિભાવવામાં આવ્યું ન હતું. જેથી તેના કોન્ટ્રાક્ટર બિહારના પૂર્વ ચંપારણના વતની
દેવેન્દ્રકુમાર પ્રહલાદભગત પ્રસાદની સામે ગુનો દાખલ કરવામાં આવ્યો હતો. આ જ
પ્રકારે
અડાલજ ગામની સીમમાં આવેલા સ્વર્ણીમ સૃષ્ટી નામની
કન્સ્ટ્રક્શન સાઇટ ઉપર પણ મજૂરોનું રજીસ્ટર નહીં મળતા કોન્ટ્રાક્ટર અમદાવાદના
સેટેલાઈટ ખાતે શુભ અમર સોસાયટીમાં રહેતા કિર્તીભાઈ કેશવલાલ પટેલ સામે ગુનો દાખલ
કરવામાં આવ્યો હતો ત્યારે અમિયાપુર ગામની સીમમાં આવેલા બ્લ્યુ ઓશીયન બિલ્ડિંગ સાઇટ
ઉપર મજૂરોનું રજીસ્ટર નહીં મળતા કોન્ટ્રાક્ટર નરેન્દ્રભાઈ જબ્બરભાઈ પ્રજાપતિ સામે
જાહેરનામા ભંગ બદલ ગુનો દાખલ કરવામાં આવ્યો છે.
