Vadodara Digital Arrest : વડોદરા પોલીસ દ્વારા ડિજિટલ એરેસ્ટ જેવી કોઈ પ્રથા નથી તે પ્રકારની અવારનવાર જાહેરાત કરી ચેતવણી આપવામાં આવતી હોવા છતાં ડિજિટલ એરેસ્ટના નામે લાખો રૂપિયાની ઠગાઈના કિસ્સાઓ બની રહ્યા છે. વડોદરાના એક નિવૃત્ત બેંક અધિકારીને સતત વીડિયો કોલ ઉપર ડિજિટલ એરેસ્ટ રાખી 64.41 રૂપિયાની છેતરપિંડી કરવામાં આવી હોવાનું બનાવ બનતા સાયબર સેલ દ્વારા ગુનો દાખલ કરવામાં આવ્યો છે.
તમાર સીમકાર્ડનો મની લોન્ડરિંગમાં ઉપયોગ થયો છે.. સામેથી ઇન્કવાયરી કરાવો તો સારું
મકરપુરા રોડ વિસ્તારમાં રહેતા 67 વર્ષીય વિવેકાનંદે પોલીસને કહ્યું છે કે, હું બેંક ઓફ બરોડા માંથી નિવૃત્ત થયેલો છું. ગીતા 23 મે એ કોઈ અજાણી વ્યક્તિએ મને ફોન કરી તમારા આધાર કાર્ડ પરથી અમુક સીમ કાર્ડ એક્ટિવ થયેલા છે અને મની લોન્ડરિંગમાં તેનો ઉપયોગ થયો છે તેમ કહ્યું હતું. ફોન કરનારે એમ પણ કહ્યું હતું કે જો આ પ્રોબ્લેમમાંથી બહાર નીકળવું હોય તો સામે ચાલીને મુંબઈ સાયબર ક્રાઇમમાં ઓનલાઇન ઇન્કવાયરી માંગો તો સારું રહેશે.
હું વિશાલ તમારો IO છું.. અનેક રાજ્યોમાં તમારા બેન્ક એકાઉન્ટ છે, વિડીયો કોલ ચાલુ થઈ ગયો
ફોન કરનાર વ્યક્તિએ મને વિશાલ ઠાકુર સાથે વાત કરાવી હતી. વિશાલે કહ્યું હતું કે હું તમારો ઇન્વેસ્ટિગેશન ઓફિસર છું. તમારા સીમકાર્ડનો ખોટો ઉપયોગ થયો છે અને હરિયાણા, પંજાબ અને તામિલનાડુ સહિતના રાજ્યોમાં તમારા નામના બેન્ક એકાઉન્ટ ખુલ્યા છે. ત્યારબાદ ફોન પરથી એકાએક વિડીયો કોલ ચાલુ થઈ ગયો હતો. તેમણે એમ પણ કહ્યું હતું કે કેનારા બેંકના એક અધિકારીના નામે થયેલા ફ્રોડમાં તમારું નામ ખુલ્યું છે.
તમને એરેસ્ટ કરવા પડશે પરંતુ સામેથી ઇન્કવાયરી માંગી છે એટલે તમારી ઈજ્જત સાચવીશું
ઠગોએ કહ્યું હતું કે, તમે સિનિયર સિટીઝન છો. નિવૃત બેન્ક અધિકારી છો અને સામેથી તપાસ માંગો છો એટલે તમારી ઈજ્જત સાચવીશું. તમને એરેસ્ટ તો કરવા પડશે જ. પરંતુ અમે ઓનલાઈન ઇન્કવાયરી ચાલુ કરીએ છીએ. ત્યારબાદ તેમણે બેન્ક એકાઉન્ટ ડિપોઝિટ મ્યુચ્યુઅલ ફંડ મિલકતોની માહિતી માગી હતી. whatsapp ઉપર આધાર કાર્ડ અને ફોટો પણ મંગાવ્યો હતો.
CBI અને RBIના લેટર મોકલ્યા,18 દિવસ વિડીયો કોલ ચાલુ રખાવ્યો.. બેંકમાં મોકલી RTGS કરાવ્યું
નિવૃત્ત બેંક અધિકારીએ કહ્યું છે કે, ત્યારબાદ મને સીબીઆઇ અને આરબીઆઈના લેટર પેડ ઉપર લખાણ મોકલવામાં આવ્યું હતું. જેમાં મારા કેસની ડિટેલ મૂકવામાં આવી હતી અને સહી સિક્કા પણ કરવામાં આવેલા હતા. મને આરબીઆઈના લેટરમાં 14.98 લાખની રકમ લખી આરટીજીએસ કરવાનું કહેવાયું હતું. જે દરમિયાન ઓડિયો કોલ ચાલુ રખાવ્યો હતો. 18 દિવસ સુધી રોજે રોજ મને વીડિયો કોલ ચાલુ કરાવી મારી દરેક પ્રવૃત્તિની વિગતો મેળવવામાં આવતી હતી અને કોઈ કારણસર કટ થાય તો મારે કારણ દર્શાવવું પડતું હતું.
ચાર ટ્રાન્ઝેક્શન કરી 64.41 લાખ ગુમાવ્યા, તેમની પાસે રકમ માંગતા લાસ્ટ ટ્રાન્જેક્શન કરવાનો આગ્રહ રાખ્યો
નિવૃત અધિકારીએ કહ્યું છે કે, મારી પાસે ચાર વખત આરટીએસ કરાવી કુલ 64.41 લાખ ટ્રાન્સફર કરાવી લીધા હતા. મેં આ રકમ પરત માગતાં ઠગોએ તમારી રિક્વેસ્ટ સ્વીકારી છે તેમ કહી લાસ્ટ ટ્રાન્ઝેક્શન પેટે 14.38 લાખ ટ્રાન્સફર કરવાનો આગ્રહ રાખ્યો હતો. જેથી મને શંકા જતા સાયબર સેલને જાણ કરી હતી અને તેમણે પોલીસ ફરિયાદ નોંધાવી કાર્યવાહી કરી છે.
