ભાવનગર
મેડિકલ કોલેજમાં શિક્ષણ જગતને લાંછન લગાડતી વધુ એક રેગિંગની ઘટના
છેલ્લા
છ મહિનાથી જુનિયર તબીબોને ટ્રોમા સેન્ટરમાં તાલિબાની સજા આપતા, જમવાના અને દારૃના
પૈસા પડાવતા હતા, મોડી સાંજ સુધી એન્ટી રેગિંગ કમિટિની બેઠક
ચાલી, તમામ લોકોના નિવેદન લેવાયા
ભાવનગર –
ભાવનગર મેડિકલ કોલેજના તબીબોનું સિનિયર તબીબો દ્વારા
રેગિંગની સવા વર્ષ પૂર્વે બનેલી ઘટના બાદ મેડિકલ શિક્ષણ જગતને શર્મસાર કરતી વધુ એક
ઘટના ભાવનગર મેડિકલ કોલેજમાં બની છે જેના ઘેરા પ્રત્યાઘાત સમગ્ર રાજ્યમાં પડયા છે.
ઓર્થોપેડિક વિભાગના ૬ સિનિયર તબીબોએ છેલ્લા આશરે પાંચથી ૬ મહિના સુધી ૧૩ જુનિયર
તબીબોને તાલિબાની સજા આપતા અંતે પીડિત તબીબો દ્વારા ફરિયાદ થઈ હતી. જેને લઈને
રેગિંગ કમિટિની બેઠક મોડી સાંજ સુધી ચાલી જેમાં તમામ પક્ષકારોના નિવેદનો લેવાયા
છે.
ભાવનગર
મેડિકલ કોલેજમાં વર્ષ ૨૦૨૫ના માર્ચ મહિનામાં સિનિયર તબીબો દ્વારા જુનિયર તબીબોનું
રેગિંગ કર્યાંની ચકચારી ઘટનાને સવા વર્ષ વિત્યું છે ત્યાં મેડિકલ શિક્ષણ જગતને
શર્મસાર કરતી વધુ એક ઘટના ભાવનગર મેડિકલ કોલેજમાં બની છે. સર ટી.હોસ્પિટલના
ઓર્થોપેડિક વિભાગમાં મેડિકલ કોલેજના પ્રથમ વર્ષના રેસિડન્ટ (આર-૧) તબીબ સાથે બીજા
વર્ષના ૬ સિનિયર તબીબે રેંગિગ કર્યાંની ફરિયાદ થઈ છે. સિનિયર તબીબો દ્વારા છેલ્લા
આશરે પાંચથી ૬ મહિના સુધી માનવતાની તમામ હદપાર કરી જૂનિયર તબીબોને હેરાન કર્યાં.
જેમાં સિનિયરો દ્વારા ૧૩ જુનિયરોને કોઈ પણ વિષય પર ૧૦ વખત લખવાનું આપી દેવામાં
આવતું. હોસ્પિટલના ટ્રોમા સેન્ટરની બહાર જવા દેવામાં આવતા નહોતા. વોર્ડમાં કલાકો
સુધી મુર્ગા બનવાની અને એક પગે ઉભા રહેવાની સજા આપતા અને બે-બે અઠવાડિયા સુધી
નાહવા નહી દેવામાં આવતા તેમજ સિનિયરોએ દારૃ અને જમવાના તથા વોર્ડના અન્ય ખર્ચા
પેટે તેમની પાસેથી કુલ રૃ.૨.૫૦ લાખ પડાવી લીધાં હતા. આ મામલે મેડિકલ કોલેજના ડીને
પીડિત અને રેગિંગ કરનારા તમામ વિદ્યાર્થીઓ તથા ફેકલ્ટીના નિવેદન લઈ એન્ટિ રેગિંગ
કમિટિને ફરિયાદ આપતા આજે સાંજે ૫.૩૦ કલાકે મેડિકલ કોલેજ ખાતે એન્ટિ રેગિંગ કમિટિની
બેઠક મળી હતી. જેમાં પીડિત તથા રેગિંગ કરનારા તમામ તબીબો તથા ઓર્થોપેડિક વોર્ડના
અન્ય વિદ્યાર્થીઓ અને તબીબોના નિવેદન લેવામાં આવ્યા હતા. બીજી તરફ આ મામલે આરોગ્ય
મંત્રી સમગ્ર ઘટનાનો રિપોર્ટ ડીન અને એન્ટિ રેગિંગ કમિટિ પાસે મંગાવ્યો છે. એન્ટિ
રેગિંગ કમિટિની બેઠક મોડી સાંજ સુધી ચાલી હતી. જેમાં રેગિંગ કરનાર સામે પોલીસ
ફરિયાદ કરવા તથા સસ્પેન્શની કાર્યવાહી થાય તેવી પ્રબળ શક્યતા છે.
એબીવીપી, એનએસયુઆઈ અને આઈએમએની
કડક કાર્યવાહીની માંગ
મેડિકલ
કોલેજમાં રેગિંગની શરમજનક ઘટના મામલે એનએસયુઆઈ દ્વારા આરોપી તબીબોને રસ્ટીગેટ કરવા, જવાબદારો સામે પગલાં
લેવા અને પોલીસ ફરિયાદ નોંધવાની માંગ સાથે ડીનને ઉગ્ર રજૂઆત કરવામાં આવી હતી. તેમજ
આ મામલે એબીવીપી દ્વારા પણ ડીનની ઓફિસનો ઘેરાવ કરી દોષિતોને કડક સજા કરવામાં આવે
અને કોઈ નિર્દોષ વિદ્યાર્થી ભોગ ન બને તેવી રીતે દાખલારૃપ કાર્યવાહી કરવામાં આવે
તેવી ઉગ્ર માંગ કરવામાં આવી હતી. તેમજ ઈન્ડિયન મેડિકલ એસોસિએશનની ભાવનગર બ્રાંચ
દ્વારા પણ કડક શિસ્તબદ્ધ કાનુની પગલાં લઈ આવી ઘટના ફરી ના બને તેવી માંગ ડીનને
કરવામાં આવી હતી.
અધિકારીનો
ઘટનાને દબાવવાનો પ્રયાસ, હવે તપાસ.. તપાસ.. રમશે
મેડિકલ
કોલેજના તબીબો સાથે રેગિંગ છેલ્લા ૬ મહિનાથી ચાલતું હતું. સ્થાનિક સ્તરે વિભાગિય
વડાને રજૂઆતો છતાં પણ કંઈ પરિણામ નહી મળતા પીડિત તબીબોએ ગત મંગળવારે મેડિકલ
કોલેજના ડીનને રજૂઆત કરી હોવાનું સૂત્રો પાસેથી જાણવા મળ્યુ છે. મેડિકલ કોલેજના
અધિકારીઓ દ્વારા ફરિયાદ મળ્યા બાદ પણ બે દિવસ સુધી તપાસ શરૃ છે તેવું રાખી સમગ્ર
ઘટનાને દબાવવાના પુરા પ્રયાસો કર્યાં હતા.
આંતરિક
રાજકારણના લીધે સંસ્થાઓ બદનામ થાય છે
સર ટી.હોસ્પિટલ
હોય કે મેડિકલ કોલેજ બન્નેમાં વિભાગિય વડાઓના આંતરિક રાજકારણના લીધે આવી ઘટનાઓમાં બન્ને
સંસ્થાને બદનામ કરવાના પુરા પ્રયાસ થાય છે અને તેના લીધે જ મેડિકલ કોલેજના ડીન અને
હોસ્પિટલના સુપ્રિટેન્ડન્ટનો કાંટાળો તાજ પહેરવા કોઈ તબીબ રાજી નથી.
