38th National Games : હલ્દ્વાની (ઉત્તરાખંડ) ખાતે યોજાયેલી 38મી રાષ્ટ્રીય રમતોમાં ગુજરાતના ખેલાડીઓએ રાજ્યનું નામ રોશન કર્યું છે. મોર્ડન પેન્ટાથલોન બાયથલે મિક્સ રિલે ઇવેન્ટમાં ઓમ નરેશ કદમ અને ફોરમ બ્રહ્મભટ્ટની જોડીએ ઉત્કૃષ્ટ પ્રદર્શન સાથે કાંસ્ય પદક જીત્યું છે.
મોડર્ન પેન્ટાથલોન ગુજરાતનું પ્રતિનિધિત્વ કરતાં ઓમ અને ફોરમે 16:03:55નો સરાહનીય સમય નોંધાવી દેશના શ્રેષ્ઠ ખેલાડીઓ સામે તીવ્ર સ્પર્ધામાં ત્રીજું સ્થાન મેળવ્યું. પદક જીત્યા બાદ ઓમ કદમે પોતાની ખુશી વ્યક્ત કરતા જણાવ્યું હતું કે, “આ સફળતા પાછળ મારા કોચ તરુણ મહેરા, મારા પરિવાર અને મારી રિલે પાર્ટનર ફોરમ બ્રહ્મભટ્ટનો અમૂલ્ય સહયોગ છે. ગુજરાત માટે રાષ્ટ્રીય રમતમાં પદક જીતવું મારા જીવનનો યાદગાર ક્ષણ છે. આગળ પણ વધુ પડકારો માટે તૈયાર છું.” મોર્ડન પેન્ટાથલોન એક અત્યંત પડકારજનક રમત છે, જેમાં સ્વિમિંગ, ફેન્સિંગ, ઘોડેસવારી, શૂટિંગ અને દોડનો સમાવેશ થાય છે. બાયથલે મિક્સ રિલે ઇવેન્ટમાં દોડ અને તરવાની સંયુક્ત સ્પર્ધા હોય છે, જેમાં સહનશક્તિ, ઝડપ અને ટીમવર્ક અત્યંત મહત્વપૂર્ણ બને છે. ઓમ અને ફોરમનું સફળ પ્રદર્શન ગુજરાતમાં મોડર્ન પેન્ટાથલોનના વધતા પ્રભાવને દર્શાવે છે. ફોરમ બ્રહ્મભટ્ટે પણ જણાવ્યું હતું કે, “ગુજરાત ઓલિમ્પિક એસોસિએશન અને અમારા માર્ગદર્શકોના સહયોગથી જ અમે રાષ્ટ્રીય રમતમાં શ્રેષ્ઠ પ્રદર્શન કરી શક્યા.” 38મી રાષ્ટ્રીય રમતોમાં દેશભરના શ્રેષ્ઠ ખેલાડીઓએ ભાગ લીધો હતો અને આ મંચ અનેક ખેલાડીઓ માટે આંતરરાષ્ટ્રીય સ્પર્ધાઓ તરફ આગળ વધવાની તક બની છે. ઓમ અને ફોરમ માટે આ કાંસ્ય પદક માત્ર એક સિદ્ધિ નહીં પરંતુ એશિયન અને વર્લ્ડ ચેમ્પિયનશિપ જેવી મોટી સ્પર્ધાઓ માટે પ્રેરણારૂપ છે.
