ચકચારી બનેલું જમીન કૌભાંડઃ ચાર ફરાર શખ્સોની શોધખોળ
ખેડૂત દંપતીના નામે બોગસ આધારકાર્ડ અને ડમી માલિકો ઊભા કરી દસ્તાવેજ નોંધાવવાનું છળઃ સૂત્રધાર સહિતની ટોળકી પકડાઈ
ગોંડલ: ગોંડલ તાલુકાના મોવિયા ગામે જમીનનાં માલિકોની જાણ બહાર બોગસ દસ્તાવેજો ઉભા કરી બારોબાર જમીન વેંચી નાંખી લાખો રૂપિયાનું કૌભાંડ આચરવા અંગે ગુનો નોંધાયા બાદ ગોંડલ તાલુકા પોલીસે મહિલા વકીલ સહિત ચાર આરોપીઓની ધરપકડ કરી છે. બીજા ચાર આરોપીઓના પણ નામ ખુલતાં તમામની શોધખોળ શરૂ કરી છે. આ સમગ્ર જમીન કૌભાંડના મુખ્ય સુત્રધાર તરીકે મૂળ મેંદરડાના અને હાલ રાજકોટનાં મનહર પ્લોટ શેરી નં.૭માં શ્રીજી દર્શન એપાર્ટમેન્ટમાં રહેતાં ઉત્તમસિંહ અભેસિંહ રાઠોડ (ઉ.વ.૩૨)નું નામ ખુલ્યું છે.
પોલીસ સૂત્રોએ જણાવ્યું કે મોવિયા ગામે સર્વે નં. ૧૦૦ પૈકીની અંદાજે ૧-૮૪-૯૬ હેક્ટર જમીન કાન્તીલાલ પાઠક અને મધુબેન પાઠકના નામે આવેલી છે. આ દંપતી હાલ અમેરિકા રહેતું હોવાથી આરોપી ઉત્તમસિંહ રાઠોડ અને તેના સાગરીતોએ જમીન હડપવાનું કાવતરું ઘડયું હતું. આરોપીઓએ તેમના નામના બોગસ આધારકાર્ડ, ચૂંટણી કાર્ડ અને પાનકાર્ડ બનાવ્યા હતા. જેના આધારે ગોંડલની કો-ઓપરેટિવ બેંકમાં ખાતું ખોલાવ્યું હતંુ. ત્યાર પછી રજિસ્ટ્રાર કચેરીમાં ડમી વ્યક્તિઓને તેમના વતી રજૂ કરી જમીનનો વેચાણ દસ્તાવેજ કરી નાખ્યો હતો. આ રીતે અલગ-અલગ ખરીદદારો પાસેથી કુલ રૂા.૭૯ લાખ જેવી માતબર રકમ મેળવી લીધી હતી.
આ સમગ્ર કારસ્તાનમાં મુખ્ય સૂત્રધાર ઉત્તમસિંહ રાઠોડે બોગસ દસ્તાવેજો બનાવી બેંકમાં ખાતું ખોલાવ્યું હતુ જયારે વકીલ ભાવનાબેન ચાવડાએ ડમી વ્યક્તિઓ શોધી આપી રજિસ્ટ્રાર કચેરીમાં તેમની જમીનનાં માલિક તરીકે ઓળખ કરાવી હતી. વિપુલગિરિ ગોસ્વામીએ લેપટોપમાં એડિટિંગ કરી ડુપ્લીકેટ આધારકાર્ડ બનાવી આપ્યા હતા. તુષાર દુદાણીએ દસ્તાવેજમાં સાક્ષી તરીકે સહીઓ કરી ડમી વ્યક્તિઓની ઓળખ આપી હતી. પોલીસે આ ચારેય આરોપીઓને ઝડપી લીધા છે. આ કૌભાંડમાં સંડોવાયેલા અન્ય આરોપીઓ ગીતાબેન કાપડી, દિનેશ નિમાવત, નિશાંત ભેટારિયા અને ગોવિંદરામ કાપડીને ઝડપી લેવા તજવીજ હાથ ધરી છે.
– મુખ્ય સૂત્રધાર રાજકોટનો, બાકીના આરોપીઓ ગોંડલના
ગોંડલ: મુખ્ય સુત્રધાર ઉત્તમસિંહે પોતે વેપાર કરતો હોવાનું પોલીસને જણાવ્યું છે, બીજો આરોપી વિપુલગીરી ગોંડલનાં મોવિયા ગામે રહે છે અને વીડિયો શુંટીંગનું કામ કરે છે. આરોપી ભાવનાબેન મૂળ દેરડીકુંભાજીનાં વતની છે હાલ ગોંડલ રહે છે. આરોપી તુષાર પણ હાલ ગોંડલ રહે છે. મૂળ મોવિયા ગામનો વતની છે. વોન્ટેડ આરોપી દિનેશ ધોરાજી, ગીતાબેન ગોંડલ, નિશાંત રાજકોટ અને ગોંવિદરામ ગોંડલ રહે છે.
– વોન્ટેડ આરોપીઓમાં કોની શું-શું ભૂમિકા
ગોંડલ: વોન્ટેડ આરોપી દિનેશ છે. જમીન માલિક કાન્તીલાલ પાઠકનો સ્વાંગ રચી વેચાણ દસ્તાવેજમાં ખોટી સહીઓ કરી હતી. દરેક દસ્તાવેજ દીઠ તેને રૂા.૧.૨૫ લાખ મળ્યા હતા. આરોપી ગીતાબેને જમીન માલિક મધુબેનનો સ્વાંગ રચી વેંચાણ દસ્તાવેજમાં ખોટી સહીઓ કરી હતી. તેને પણ દરેક દસ્તાવેજ દીઠ રૂા.૧.૨૫ લાખ મળ્યા હતા. આરોપી નિશાંતે વેંચાણ દસ્તાવેજમાં સાક્ષી તરીકે રહી ડમી વ્યક્તિઓની ઓળખ આપી હતી. જ્યારે આરોપી ગોવિંદરામે ડમી વ્યક્તિઓની વ્યવસ્થા કરી આપી હતી. બદલામાં તેને રૂા.૩૫ હજાર મળ્યા હતા.
