અમદાવાદ,શનિવાર,8 નવેમ્બર,2025
અમદાવાદ મ્યુનિસિપલ કોર્પોરેશનમાં સત્તાપક્ષમાં બેઠેલા
ભાજપના કોર્પોરેટરોની રખડતા પશુ પકડવા મામલે બેવડી નિતી સામે આવી છે.શહેરમાંથી રખડતા
કૂતરાં પકડીને જે તે વોર્ડમાં રાખવા પ્લોટ બતાવવા અગાઉ હેલ્થ કમિટીના સભ્યોએ
ઈન્કાર કર્યો હતો.હવે રખડતા ભૂંડને પકડીને રાખવા રાણીપ વોર્ડમાં પ્લોટ બતાવવા
ભાજપના બે કોર્પોરેટરોએ ધરાર ના પાડી દીધી છે. ઉપરાંત તેમના વોર્ડમાંથી પકડવામા
આવનારા ભૂંડને ફરી પાછા તેમના વોર્ડમાં નહીં છોડવા અંગે કોર્પોરેશનના સંબંધિત
વિભાગના અધિકારીને ચિમકી આપી હોવાનુ આધારભૂત સૂત્રોમાંથી જાણવા મળ્યુ છે.
શહેરમાં કેટલ ન્યુસન્સ કંટ્રોલ પોલીસી-૨૦૨૩ મુજબ વિવિધ રોડ
ઉપરથી ગાય સહિત રખડતા અન્ય પ્રાણી પકડીને દાણીલીમડા,બાકરોલ ખાતે આવેલા ઢોરના ડબા ખાતે રાખવામા આવે છે.સુપ્રીમ
કોર્ટે તમામ શહેરમાં રોડ ઉપર રખડતા કૂતરાં પકડવા રાજય સરકાર અને મ્યુનિસિપલ
કોર્પોરેશનને પણ આદેશ કર્યો છે.ગત હેલ્થ કમિટીની બેઠકમાં કમિટી ચેરમેન સહિત હાજર
તમામ ભાજપના કોર્પોરેટરોએ તેમના વોર્ડમાંથી રખડતા કૂતરાં તાકીદે પકડવા સંબંધિત
અધિકારીને સુચના આપતા અધિકારીએ કહયુ,
હાલ કોર્પોરેશન પાસે પુરતી જગ્યાનો અભાવ છે.ચૂંટાયેલા પ્રતિનિધિ તેમના
વોર્ડમાં ડોગ શેલ્ટર બનાવવા નાની એવી જગ્યા બતાવે બાકીની વ્યવસ્થા કોર્પોરેશન
કરશે.એ સમયે તમામ કોર્પોરેટરોએ કહયુ હતુ કે,
અમારા વોર્ડમાંથી તમે રખડતા કૂતરાં પકડો અને એમને રાખવાની જગ્યા અમારે
બતાવવાની એમ ના બને.આ બંને બનાવ સુચવે છે કે ભાજપના કોર્પોરેટરોને માત્ર ભલામણ
કરવાની હોય છે.કામગીરી તો તંત્ર કરતુ હોય છે. છતાં તેમને રખડતા કૂતરાં કે ભૂંડને
તેમના વોર્ડમાં રાખવાનુ ગમતુ નથી.કયાંક લોકોના રોષનો ભોગ બનવુ ના પડે એ કારણ પણ
હોઈ શકે છે.
બધે ભાજપ સત્તામા છતાં એનીમલ હોસ્ટેલ માટે પ્લોટ આપવા
ઈન્કાર
રાજયથી લઈ અમદાવાદ મ્યુનિસિપલ કોર્પોરેશન સુધી તમામ સ્તરે
ભાજપ સત્તામા છે. આમ છતાં વર્ષ-૨૦૧૯થી અમદાવાદ મ્યુનિસિપલ કોર્પોરેશનને સાણંદ પાસે
એનીમલ હોસ્ટેલ બનાવવા માટે પ્લોટ આપવા વહીવટીતંત્ર તરફથી ઈન્કાર કરાઈ રહયો છે.
૪૫ કરોડના ખર્ચે કઠવાડામા ગૌ શાળા બનાવવાની દરખાસ્ત મોકૂફ
રખાઈ
મ્યુનિ.કોર્પોરેશન હદમા વર્ષ-૨૦૨૧માં નવા સમાવાયેલા કઠવાડા
વિસ્તારમા રુપિયા ૪૫ કરોડના ખર્ચે ગૌ શાળા બનાવવા ભાજપના સ્ટેન્ડિંગ કમિટી
ચેરમેનના બજેટમા દરખાસ્ત મુકાઈ.બીજા સ્ટેન્ડિંગ કમિટી ચેરમેને ૪૫ કરોડ ગૌ શાળા
પાછળ ખર્ચ કરવા કરતા પ્રાથમિક સુવિધા પાછળ ખર્ચ કરો કહી ગૌ શાળાની દરખાસ્ત મોકૂફ
રખાવી દીધી છે.
