– બેન્કે લૂંટની 45 મિનિટ પછી પોલીસને જાણ કરી
– લૂંટાયેલી બેન્ક પાસે છેલ્લા ચાર વર્ષથી સમખાવા પૂરતો સિક્યોરિટી ગાર્ડ પણ ન હોવાથી લૂંટારુઓને મજા પડી ગઈ
નવી દિલ્હી : મધ્યપ્રદેશના જબલપુરમાં પાંચ લૂંટારુઓ બેન્ક પર ત્રાટક્યા હતા અને ફક્ત ૧૮ મિનિટમાં જ ૧૪ કરોડના સોનાની અને પાંચ લાખ રૂપિયા રોકડાની ચોરી કરીને ફરાર થઈ ગયા હતા. તેમની આ ચીલઝડપ ફક્ત જબલપુરમાં જ નહીં મધ્યપ્રદેશમાં ચર્ચાનો વિષય બની ગઈ છે. આશ્ચર્યની વાત એ છે કે બેન્કે ૪૫ મિનિટ પછી ચોરીની જાણ કરી હતી અને બેન્કમાં ચાર વર્ષથી એક સિક્યોરિટી ગાર્ડ પણ નથી.
સિક્યોરિટી ગાર્ડ વગરની બેન્કના કારણે આ લૂંટારુઓને રીતસરનું મોકળું મેદાન મળી ગયું હતું. જાણે આકડે મધ હોય તેવી સ્થિતિ હતી. લૂંટારુઓ બેન્કની ખિતોલા બ્રાન્ચમાં સોમવારે સવારે ૮-૫૦ વાગે આવ્યા ત્યારે ફક્ત છ કર્મચારી જ બેન્કમાં હતા. ૯-૦૮ વાગે તો બેન્ક લૂંટી ભાગી ગયા હતા.
લૂંટારુઓ બે મોટરસાઇકલ પર આવ્યા હતા. સીસીટીવીમાં ચહેરો ન આવે તે માટે તેમણે હેલમેટ પહેર્યા હતા. તેમણે આ રીતે બતાવ્યું હતું કે હેલ્મેટ આ રીતે પણ જરૂરી છે. તેઓએ લોકરોમાં રાખેલું ૧૪.૮૭૫ કિ.ગ્રા. ગોલ્ડ લૂંટયું હતું અને પાંચ લાખ રોકડા લૂંટયા હતા.
જબલપુર રેન્જના ડીજીપી અતુલસિંઘે જણાવ્યું હતું કે લૂંટારુઓએ ફક્ત ૧૮ મિનિટમાં લૂંટની ઘટનાને અંજામ આપ્યો હતો. અમે સીસીટીવી કેમેરા સ્કેન કર્યા છે અને તે તેમા જોઈ શકાયું છે કે તે મોટરસાઇકલ પર ભાગી ગયા હતા. તેમની પાસે શસ્ત્રો ન હતા. ખાલી એકાદ લૂંટારુએ તેના પટ્ટા નીચે તમંચા જેવું કોઈ શસ્ત્ર રાખ્યુ હતુ.
સિંઘે જણાવ્યું હતું કે બેન્કે તેમને ઘટનાની ૪૫ મિનિટ પછી જાણ કરી હતી, જો તેમણે વહેલા કીધું હોત તો લૂંટારુઓની ધરપકડ થઈ ચૂકી હોત. બેન્ક સામાન્ય રીતે સાડા દસ વાગે ખૂલતી હોય છે, પરંતુ તહેવારોને ધ્યાનમાં રાખીને તે સવારે ૮ વાગે ખોલવામાં આવી હતી.
